කොළඹ කොටස් වෙළෙඳපොළ ගනුදෙනුවල දී ඊයේ (08) තරමක වර්ධනයක් සනිටුහන් කළේය. ඉකුත් සඳුදා සිදුවූ බරපතළ බිඳවැටීම ආවරණය කරන්නට එය අසමත් වූ බව සඳහන් කළ යුතුය. අඩු මිල ගණන් හේතු කොටගෙන උපායශීලී ආයෝජකයන් කොටස් මිල දී ගත් අතර, දිනයේ ආරම්භයේ සිට අවසානය දක්වා වර්ධනකාරී පසුබිමක පැවැතිණ. 

සියලු කොටස් මිල දර්ශකය ඒකක 15,127.71 ක් වූ අතර, එය දර්ශක 467.26 ක වර්ධනයකි. ගනුදෙනු අවසන් වන විට එස්.ඇන්.ඩී.පී. ශ්‍රී ලංකා දර්ශකය 4,458.45 ක් වශයෙන් අවසන් වූ අතර, එය දර්ශක 193.65 ක ඉහළ යෑමක් සේ දැක්විය හැකිය. දිනයේ පිරිවැටුම රු. බිලියන 2.89 ක් තෙක් ඉහළ ගියේය. මෙදින වාර්තා වූ ගනුදෙනු ප්‍රමාණය 20,268ක් වූ අතර, කොටස් මිල ඉහළ ගිය සමාගම් ගණන 225 කි. මිල ගණන් පහත වැටුණ සමාගම් ප්‍රමාණය 26 වේ. වෙළෙඳපොළ ප්‍රාග්ධනීකරණය රු. බිලියන 5,253.1ක් ඇත. 

ඉදිරි දිනවල මිල දී ගැනීම සඳහා පසුබිමක් පවතින අතර, කෙටිකාලීන ලාභ සඳහා වහාම විකිණීම හේතුකොටගෙන උච්ඡාවචනයක් අපේක්ෂා කළ හැකිය. කලාපයේ කොටස් වෙළෙඳපොළ පසුබෑම සමග ඒවායේ ආයෝජනයට ඉදිරිපත්වීම ඉදිරියේ විදේශ සහභාගීත්වය සීමාසහිතවීමට ඉඩ ඇත. මෙදින ගනුදෙනුවලදී පවා විදේශ ගැනුම් රු. මිලියන 151.5ක් වූ අතර, විකිණුම් රු. මිලියන 103.2 කි. ශුද්ධ ලැබීම් රු. මිලියන 48.3ක් වශයෙන් සඳහන්ය. 

සම්පත් රු. මිලියන 302ක්, හැටන් නැෂනල් රු. මිලියන 163 ක්, ජෝන් කීල්ස් රු. මිලියන 138ක්, ඇක්සස් ඉන්ටර්නැෂනල් රු. මිලියන 123ක්, ප්‍රයිම් ලෑන්ඩ් රු. මිලියන 90ක්, රීල් ප්‍රොපටි රු. මිලියන 87ක්, බ්‍රවුන්ස් ඉන්වෙස්ට්මන් රු. මිලියන 70ක් සහ නේෂන් ට්‍රස්ට් බැංකුව රු. මිලියන 68ක් වශයෙන් මෙදින පිරිවැටුමට වැඩිම දායකත්වයක් දක්වන ලද සමාගම් අතර තිබුණි.