• ඇමෙරිකාවට කළ ඇඟලු‍ම් අපනයන සියයට 7.43 කින් පහත වැටිලා
• එක්සත් රාජධානිය හැර යුරෝපා සංගමයේ අනෙකුත් රටවලට කළ අපනයන සියයට 7.54 කින් ඉහළ ගිහින්

විමුක්ති එස් රුද්‍රිගු

2024 වසරේ පෙබරවාරි මාසයට සාපේක්ෂව මෙම වසරේ පෙබරවාරි මාසයේදී මෙරට ඇඟලු‍ම් අපනයන සියයට 2.3 ක වර්ධනයක් පෙන්නුම් කර ඇතැයි ඒකාබද්ධ ඇඟලු‍ම් සංගම් සංසදයේ නවතම දත්ත වාර්තා පෙන්වා දෙයි.

සමස්තයක් ලෙස 2024 පෙබරවාරි මාසයට සාපේක්ෂව මෙම වසරේ පෙබරවාරි මාසයේදී ඇඟලු‍ම් අපනයනවල වර්ධනයක් පෙන්නුම් කළත් එක්සත් රාජධානිය සහ ඇමෙරිකාව වැනි ප්‍රධාන වෙළෙඳපොළේ අපනයන පහළ ගොස් ඇත. මෙම වසරේ පෙබරවාරි මාසයේදී ඇමෙරිකාවට කළ ඇඟලු‍ම් අපනයන සියයට 7.43 කින් පහත වැටී ඇති අතර ඉන් මෙරටට ලැබුණු අපනයන ආදායම ඇමෙරිකානු ඩොලර් මිලියන 153.11 කි

එසේම එක්සත් රාජධානියට කළ අපනයන සියයට 14.58 කින් පහත වැටී ඇති අතර ඉන් ලැබූ අපනයන ආදායම ඇමෙරිකානු ඩොලර් මිලියන 54.85 කි.

එක්සත් රාජධානිය හැර යුරෝපා සංගමයේ අනෙකුත් රටවලට කළ අපනයන සියයට 7.54 කින් ඉහළ ගොස් ඇති අතර ඉන් ඇමෙරිකානු ඩොලර් මිලියන 120.69 අපනයන ආදායමක් උපයා ඇත. කෙසේ නමුත් 2024 පෙබරවාරි මාසයට සාපේක්ෂව මෙම වසරේ පෙබරවාරි මාසයේදී අනෙකුත් රටවලට සිදු කෙරෙන ඇඟලු‍ම් අපනයන සියයට 39.85 කින් ඉහළ ගොස් ඇති අතර ඉන් ඉපැයූ අපනයන ආදායම ඇමෙරිකානු ඩොලර් මිලියන 79.28 කි.

2024 වසරේ පළමු මාස දෙකට සාපේක්ෂව මෙම වසරේ පළමු මාස දෙක තුළදී ඇඟලු‍ම් අපනයන සියයට 12 කින් වර්ධනය වී ඇති අතර ඉන් ඇමෙරිකානු ඩොලර් මිලියන 845 ක ආදායමක් උපයා ඇත. මෙම වසරේ ජනවාරි සහ පෙබරවාරි මාසයේදී පසුගිය වසරේ මෙම කාලයට සාපේක්ෂව ඇමෙරිකා වෙළෙඳපොළේ ඇඟලු‍ම් අපනයනයන සියයට 8.12 කින් වර්ධනය වී තිබේ.

ඉන් ඇමෙරිකානු ඩොලර් මිලියන 322.86 ආදායමක් උපයා ඇත. එක්සත් රාජධානිය හැර යුරෝපා සංගමයේ අනෙකුත් රටවලට සිදු කෙරෙන ඇඟලු‍ම් අපනයන ජනවාරි සහ පෙබරවාරි මාසයේදී සියයට 17 කින් වර්ධනය වී ඇති අතර ඉන් ඉපැයූ අපනයන ආදායම ඇමෙරිකානු ඩොලර් මිලියන 250.18 කි.

ගෙවුණු මාස දෙකක කාලය තුළ වැඩිම ප්‍රතිශතයකින් ඇඟලු‍ම් අපනයන වර්ධනය වී ඇත්තේ අනෙකුත් රටවල්වලට වන අතර එය ප්‍රතිශතයක් ලෙස සියයට 23.16කි. ඉන් ඉපැයූ අපනයන ආදායම ඇමෙරිකානු ඩොලර් මිලියන 155.54 කි.