බටහිර ඉවුරේ තවදුරටත් ජනවාස ඉදිකිරීමට ඊශ්‍රායලය ගත් තීරණයට එක්සත් ජාතීන්ගේ සංවිධානය  විරුද්ධත්වය ප්‍රකාශ කර තිබේ.

රාජ්‍ය දෙකක් අතර සාමය ගොඩනැගීමට ඒකපුද්ගල තීරණ බාධාවක් යැයි ද එම විරෝධය පළ කරමින් එක්සත් ජාතීන්ගේ මහ ලේකම්වරයාගේ ප්‍රකාශක  ස්ටෙෆාන් ඩුජාරික් මහතා පැවැසීය. 

නිවාස අවශ්‍යතාවට පිළියමක් ලෙස ඊශ්‍රායලය යුදෙව් ජනාවාසවල තවත් නිවාස 2,500ක් ඉදි කරන බව ඊශ්‍රායල අගමැති බෙන්ජමින් නෙදන්යාහු මහතා පසුගිය අඟහරුවාදා පැවැසීය. ඇමෙරිකා එක්සත් ජනපදයේ නව ජනාධිපති ඩොනල්ඞ් ට්‍රම්ප් මහතා රාජකාරී ආරම්භ කිරීමෙන් පසු ඊශ්‍රායල බලධාරීන් එවැනි ප්‍රකාශයක් කළ දෙවැනි අවස්ථාව එය විය.  

අනාගත රාජ්‍යයක් උදෙස තිබෙන විශ්වාසය   බිඳ වැටෙන මෙවැනි ප්‍රකාශ හා තීන්දු තීරණ සාමයට බාධාවක් බවත් පලස්තීන බලධාරීහූ ප්‍රකාශ කරති.  “රාජ්‍ය දෙකක විසඳුමකට බී සැලැස්මක් මහලේකම් ළඟ නැහැ” යැයි එක්සත් ජාතීන්ගේ මහලේකම් ඇන්ටෝනියෝ ගුටරෙස්ගේ මහතාගේ ප්‍රකාශක  ස්ටෙෆාන් ඩුජාරික් මහතා ප්‍රකාශ කළේය.  “ඒකපාර්ශවීක තීරණ රාජ්‍ය දෙකක අරමුණ කරා යන්න බාධාවක්. මහලේකම්වරයා මේ සම්බන්ධයෙන් දැඩි අවධානයකින් සිටිනවා” යැයි ද ස්ටෙෆාන් ඩුජාරික් මහතා කීය. “පාර්ශව දෙකම අවංකව සාකච්ඡාවල නිරත වීමේ අවශ්‍යතාවක් තිබෙනවා. රාජ්‍ය දෙකක ඉලක්කය වෙත ගමන් කිරීමට එය අත්‍යාවශයයි. ඊශ්‍රායලත් පලස්තීනයත් රාජ්‍ය දෙකක්. ජනතාව සඳහා රාජ්‍ය දෙකක්” යැයි ද ස්ටෙෆාන් ඩුජාරික් මහතා කීවේය.

ඇමෙරිකා එක්සත් ජනපද ජනාධිපති ඩොනල්ඞ් ට්‍රම්ප් මහතා ද මෙම ජනවාස ඉදිකිරීම්වලට සහාය වනු ඇතැයි පැවසේ. හිටපු ජනාධිපති බැරැක් ඔබාමා මහතා ද ඊශ්‍රායලය කරන ජනාවාසවලට සහාය දැක්වීය. ජනාවාසවලට සහාය දක්වන තානාපතිවරයකු ඊශ්‍රායලට පත් කිරීමට ද ඇමෙරිකා ජනාධිපතිවරයා කටයුතු කර තිබිණි.

ඊශ්‍රායලය කරන ලද ජනාවාස කඩිනමින් ඉවත් කරන්නැයි ඉල්ලමින් එක්සත් ජාතීන්ගේ ආරක්ෂක කවුන්සිලයට ඉදිරිපත් කරන ලද යෝජනාවට එරෙහිව නිෂේද බලය භාවිත නොකිරීම සම්බන්ධයෙන් ද ඩොනල්ඞ් ට්‍රම්ප් මහතා හිටපු ජනාධිපති බැරැක් ඔබාමා මහතාට චෝදනා එල්ල කළේය. 

වසර 1967 දී ඊශ්‍රායලය බටහිර ඉවුරත් නැගෙනහිර ජෙරුසලමත් අත්පත් කරගැනීමෙන් පසු මේ දක්වා කාලයේදී ජනාවාස 140කට වැඩි ප්‍රමාණයක් ඉදි කර ඇති අතර 500,000ක් පමණ දෙනා එහි ජීවත් වෙති. 

ජාත්‍යන්තර නීතිය යටතේ මෙම ජනාවාස නීති විරෝධී යැයි සැලකුණද ඊශ්‍රායලය එය නොපිළිගනියි.