ෆීජී රාජ්‍යයට බලපා තිබෙන ‘සරායි’ සුළි කුණාටුවෙන් දෙදෙනකු මියගොස් 2,500කට වැඩි පිරිසක් අවතැන්ව සිටිති.

සුළි කුණාටුව නිසා නිවාසවලට අමතරව එරට වගාවලට ද හානි සිදු වූ අතර බෝග රැසක් විනාශ විය. සුළි කුණාටුව නිසා ෆීජී රාජ්‍යයේ ප්‍රදේශ රැසක විදුලිබලය ද ඇණහිටියේය.

සුළි කුණාටුවෙන් ෆීජී රාජ්‍යයේ සංචාරක කර්මාන්තයට ද දැඩි බලපෑමක් එල්ල විය. ෆීජී රාජ්‍යය සංචාරක කර්මාන්තය තුළ ඉහළ ප්‍රසිද්ධියක් උසුළයි. සුළි කුණාටුව නිසා ජාත්‍යන්තර ගුවන් ගමන් කිහිපයක්ම අවලංගු කිරීමට ද එරට බලධාරීන්ට සිදුවිය.

‘සරායි’ සුළි කුණාටුවෙන් 2,538 දෙනකු අවතැන්ව සිටින අතර ඔවුන් මුදා ගැනීමේ මධ්‍යස්ථාන 70කට යොමු කළ බව බලධාරීහු කීහ. එරට වේලාවෙන් ඉරිදා පස්වරුව වනවිට 500කට ආසන්න පිරිසකට ඔවුන්ගේ නිවෙස්වලට යෑමට අවස්ථාව උදා වූ බව ද ඔවුහු පැවැසූහ.

අගනුවර වන සූවා හි සියයට 80කට පමණ නැවත විදුලිබලය ලබා දීමට හැකි වූ බව එරට විදුලි සමාගම සඳහන් කළ අතර සම්පූර්ණ විදුලි සැපයුම නැවත ස්ථාපිත කිරීමට සතියක පමණ කාලයක් ගත් වනු ඇතැයි ද සඳහන් කළේය.

පැයට කිලෝමීටර 150ක වේගයෙන් හමායන ‘සරායි’ සුළි කුණාටුව නැගෙනහිර දෙසට ගමන් කරමින් තිබෙන අතර නව අවුරුදු උදාවත් සමඟ ටොන්ගා රාජ්‍යය පසු කර යෑමට නියමිතය.

ඒ.එෆ්.පී. 
055