සිරියාවේ ඊශ‍්‍රායල දේශසීමාව අසල ගෝලාන් කඳුකරයේ දී ඉකුත් බ‍්‍රහස්පතින්දා (7) පැහැර ගැනුණු එක්සත් ජාතීන්ගේ සාම සාධක භටයන් 21 ක් දෙනා මුදා හැරීමට සිරියානු කැරැලිකරුවෝ ඊයේ (10) පියවර ගත්හ.
එම භට කණ්ඩායම කැරැලිකරුවන්ගේ ග‍්‍රහණයට හසු වූ අවස්ථාවේ එක්සත් ජාතීන්ගේ මහ ලේකම් බෑන් කී මූන් සිරියානු කැරැලිකාර පාර්ශ්වය නියෝජනය කරන සිරියානු ජාතික පාලක මණ්ඩලයෙන් ඉල්ලීමක් කළේ තම භට කණ්ඩායම වහා නිදහස් කරන ලෙසටය.
කෙසේ නමුත් කැරැලිකරුවෝ එම ඉල්ලීමට ක්ෂණික ප‍්‍රතිචාරයක් නොදැක්වූහ. සාම සාධක භට කණ්ඩායම මුදා හැරීමට කැරැලිකරුවන් පියවර ගෙන ඇත්තේ ඔවුන් රඳවාගෙන ප‍්‍රශ්න කිරීමෙන් පසුවය.
භට පිරිස රඳවා තබා ඇත්තේ ජාමල්ලා නමැති ගම්මානයේය. ඊයේ එම පිරිස දේශසීමා හරහා ජෝර්දාන බලධාරීන්ට බාර දුන් බව ද කැරැලිකරුවෝ වැඩි දුරටත් කියා සිටියහ.
 සාම සාධක භට කණ්ඩායම සිරියා ජනපති බෂීර් අල් අසාද්ට සහාය දක්වන බවට සැක පහළ වී ඔවුන් අත්අඩංගුවට ගත්තේ යැයි සිරියානු කැරැලිකරුවෝ වැඩි දුරටත් කියා සිටිති. 
සිරියාවේ සිවිල් යුද්ධයට වසර දෙකකට ආසන්න කාලයක් ගත වී ඇතත් සිරියානු කැරැලිකරුවන් සහ එක්සත් ජාතීන්ගේ සාම සාධක නිලධාරීන් අතර අර්බුදයක් හටගත් පළමු අවස්ථාව මෙයයි.