සිරියාවේ ඩමැස්කස් අගනුවරට නුදුරු නගර තුනකට ඉකුත් 21 වැනිදා එල්ල වූ සෙරීන් විස වායු ප‍්‍රහාරයට සිරියානු රජය වගකිව යුතු යැයි චෝදනා කරමින් සිරියා රජයට එරෙහිව හමුදා කි‍්‍රයාමාර්ගයක් ගැනීමෙන් වළකින්නැයි ඉරානයත් රුසියාවත් ඇමෙරිකාවට අනතුරු අඟවමින් කියා සිටී.

ඇමෙරිකාව, බි‍්‍රතාන්‍යය සහ ප‍්‍රංශය සිරියාවේ ආයුධ සන්නද්ධ කැරැලිකරුවන්ට සහ විපක්ෂ දේශපාල කණ්ඩායම්වලට සහාය දෙද්දී, ඉරානය සහ රුසියාව සිරියා ජනපති බෂීර් අල් අසාද්ට සහ ඔහුගේ රජයට සහාය දෙයි.

සිරියානු අර්බුදය වසර දෙකකට ආසන්න කාලයක් දිග්ගැස්සුණේ ලෝකයේ රටවල් සිරියානු අර්බුදය සම්බන්ධයෙන් බල කඳවුරු දෙකකට වෙන් වී සිටීම නිසාය.

ඉකුත් 21 වැනිදා එල්ල වූ සෙරීන් විස වායු ප‍්‍රහාරයට, සිරියානු ජනාධිපති බෂීර් අල් අසාද් ප‍්‍රමුඛ ඔහුගේ රජය සම්බන්ධ බව තහවුරු වුවහොත්, දෙවරක් නොසිතා සිරියාවට එරෙහිව හමුදා කි‍්‍රයා මාර්ගයක් ගන්නා බව ඇමෙරිකා ජනපති බැරැක් ඔබාමා අනතුරු ඇඟවූයේ පෙරේදාය.

ඉරානය කියා සිටියේ සිරියානු රජයට බොරු චෝදනා කරමින් ඇමෙරිකාව සිරියාවට එරෙහිව හමුදාමය කි‍්‍රයා මාර්ගයක් ගන්නේ නම් තමන් ඒ ගැන නිහඬව නොසිටින බවය.

සිවිල් වැසියන් ඝාතනය කළේ යැයි චෝදනා කර, සිරියානු ජනපති අසාද්ගේ රජය පෙරැළීමට ඇමෙරිකාව, බි‍්‍රතාන්‍යය සහ ප‍්‍රංශය ඇතුළු බටහිර රටවල් කුමන්ත‍්‍රණය කරන බවටත් රුසියාව සහ ඉරානය චෝදනා කර ඇත.

සිරියාවේ සිදුවුණැයි කියන ‘මානව සංහාරය’ සම්බන්ධයෙන් බටහිර ගැති මාධ්‍ය විශාල ප‍්‍රසිද්ධියක් දීමට කටයුතු කළ බවත් එම ප‍්‍රහාරය නිමිත්තක් කර ගනිමින් ලිබියාවට කළාක් මෙන් සිරියාවට ද බටහිර රටවල් පහර දීමට උත්සහ කරන බවටත් රුසියාවත් ඉරානයත් වැඩි දුරටත් කියා සිටී.

ඉරාන රජය පෙරේදා කියා සිටියේ, සිරියාවේ ඩමැස්කස් නුවරට නුදුරින් සෙරීන් විස වායු යොදා ගෙන පහර දීමක් සිදුවූයේ නම්, ඊට සිරියානු රජයේ සම්බන්ධයක් නොමැති බවත් එය කළේ කැරැලිකාර පාර්ශ්වයට සහාය දෙන ‘තක්ෆීරි’ නමැති ඉස්ලාමීය සටන්කාමී සංවිධානය බවත්ය.

ඇමෙරිකන් ආරක්ෂක ලේකම් චක් හේගල්ගේ අණ පරිදි ඇමෙරිකන් හමුදාව ඔවුන් සතු දිගු දුර මිසයිල සිරියාව දෙසට හරවා ඇති අතර ඇමෙරිකා යුද නැව් කිහිපයක් ද මධ්‍යධරණී මුහුදට සේන්දු වී තිබේ.

සිරියාවට එරෙහිව ඇමෙරිකන් රජය හමුදාමය කි‍්‍රයා මාර්ගයක් ගන්නේ නම්, පැය කිහිපයක් ඇතුළත පහර දී සිරියා ගුවන් හමුදාව අඩපණ කිරීමට තමන්ට හැකි බවත් ඒ සඳහා මේ වනවිට සැලැසුම් සකස් කර අවසන් බවත් ඇමෙරිකා රජයේ ඒකාබද්ධ මාණ්ඩලික ප‍්‍රධාන හමුදාපති ජරනාල් මාටින් ඩැම්ප්සි කියා සිටී.

ඉකුත් 21 වැනිදා සිදුවුණු එම විස වායු ප‍්‍රහාරය එල්ල කළේ සිරියානු රජය යැයි චෝදනා කළේ සිරියානු විපක්ෂ කණ්ඩායම් සහ කැරැලිකරුවන්ය.
සිරියානු රජය තරයේ කියා සිටින්නේ එම විස වායු ප‍්‍රහාරයට තමන් සම්බන්ධ නැති බවත් එය සිදු කළේ රටේ ත‍්‍රස්තවාදය පතුරුවන ඇමෙරිකාව, බි‍්‍රතාන්‍යය සහ ප‍්‍රංශයේ ආධාර ලබන කැරැුලිකරුවන් සහ සටන්කාමීන් කියාය.