සිම්බාබ්වේ රාජ්‍යයේ විපක්ෂ කණ්ඩායම්වල විරෝධය නොතකා ලබන වසරේ මහ මැතිවරණයක් පැවැත්වීමට එරට ජනාධිපති රොබට් මුගාබේ පෙරේදා (3) තීරණය කළේය. සිම්බාබ්වේ විපක්ෂ කණ්ඩායම් පමණක් නොව දකුණු අපි‍්‍රකා කලාපීය සංවර්ධන සංවිධානය ද ජනපති මුගාබේගේ එම තීරණයට විරෝධය පළ කරමින් ජනපතිවරයාගෙන් ඉල්ලා සිටින්නේ නව ආණ්ඩු ක‍්‍රම ව්‍යවස්ථාවක් සම්මත කොට ඉන්පසු මැතිවරණය පවත් වන ලෙසටය. සිම්බාබ්වේ ජනපති මුගාබේ මීට දෙවසරකට පෙර එරට ප‍්‍රධාන දේශපාලන කණ්ඩායම වන ‘ප‍්‍රජාතන්ත‍්‍රවාදී විපර්යාස පක්ෂය’ සමඟ එක්වී සමඟි රජයක් පිහිටුවූයේ රටේ කඩාවැටුණු ආර්ථිකය ගොඩනැගීමේ අරමුණ ඇතිවය. එහෙත් එම සමඟි රජයට එම අරමුණ ඉටු කර ගැනීමට නොහැකි වී ඇති නිසා නියමිත දිනයට පෙර මහ මැතිවරණයක් පැවැත්වීමට තමා තීරණය කළ බව ජනපති මුගාබේ මාධ්‍ය හමුවේ කියා සිටියේය. නව ආණ්ඩුක‍්‍රම ව්‍යවස්ථාවක් සම්මත කරන්නැයි කියමින් මැතිවරණය කල් දමන්නැයි බල කරන විපක්ෂ දේශපාලන කණ්ඩායම්වලට දොස් පවරමින් මුගාබේ කියා සිටියේ මැතිවරණයට මුහුණ දීමට බියෙන් පසුවන අතළොස්සක් නිසා තම තීරණය කිසිවිටෙකවත් වෙනස් නොකරන බවය. කෙසේ නමුත් නව ආණ්ඩු ක‍්‍රමයක් සම්මත කොට නව ආරක්ෂක නීති සහ මැතිවරණ නීති හඳුන්වා නොදෙන්නේ නම් තමන් මැතිවරණය වර්ජනය කරනවා යැයි ප‍්‍රජාතන්ත‍්‍ර විපර්යාස පක්ෂයේ නායක මෝගන් ස්වංගිරායි පවසා ඇත.
ජොහැන්ස්බර්ග් (රොයිටර්)