ලතින් ඇමෙරිකානු රටක් වන වෙනිසියුලාවේ ජනාධිපතිවරණය ඉකුත් සති අන්තයේ (7 වැනිදා) පැවැත්වුණු අතර කවුරුත් බලාපොරොත්තු වූ පරිදි වත්මන් ජනපති හියුගෝ චාවේස්ට විශිෂ්ට ජයක් හිමිවිය. ඒ අනුව, සිවුවැනි වරටත් ජනපති ධුරයට පත් චාවේස් වසර 2019 තෙක් එම ධුරයේ කටයුතු කරනු ඇත. චාවේස්ගේ වසර 14 ක සමාජවාදී පාලනය පෙරළා දැමීමේ අරමුණින් මෙවර විපක්ෂ දේශපාලන කණ්ඩායම් එක් වී ඉදිරිපත් කළ ‘තුරුම්පුව’ වූයේ අපේක්ෂක 40 හැවිරිදි හෙන්රීකේ කැප්රිලේ ය. ජනපතිවරණයේ ප‍්‍රධාන අපේක්ෂකයන් දෙදෙනා වූයේ ද චාවේස් සහ කැප්රිලේ ය. ඡන්ද සටන ආරම්භ වූ අවස්ථාවේදී ඇතැමුන් අනුමාන කළේ කැප්රිලේගෙන් චාවේස්ට අභියෝගයක් එල්ල වනු ඇති බවය. මධ්‍ය දක්ෂිණාංශික, යුක්තිය පෙරට නමැති පක්ෂයේ නායකයා වන කැප්රිලේ 2008 වසරේ සිට මේ වන තෙක් බරූටා ප‍්‍රාන්තයේ ආණ්ඩුකාරවරයා ලෙස කටයුතු කර ඇත. කෙසේ නමුත් අවසන් ජනමත සමීක්ෂණවලින් පෙනී ගියේ චාවේස් නිසැක වශයෙන්ම ජයග‍්‍රහණය කරනු ඇති බවය. ලැබූ විශිෂ්ට ජයග‍්‍රහණයත් සමඟ ලතින් ඇමෙරිකා ඉතිහාසයේ මහා බලවතකු ලෙස නම රැඳවීමට චාවේස් සමත් ව ඇතැයි විදෙස් පුවත් සේවා වාර්තා කරයි. ප‍්‍රකාශිත සියයට 90 ක ඡුන්දවලින්, 58 හැවිරිදි චාවේස්, සියයට 54.42 ක ප‍්‍රතිශතයක් හිමිකරගෙන සිටි අතර විපක්ෂ අපේක්ෂක කැප්රිලේ ට හිමිකර ගැනීමට හැකිවූයේ සියයට 44.97 ක ඡන්ද ප‍්‍රතිශතයක් පමණි. ජයග‍්‍රහණයෙන් පසු තම විපක්ෂ දේශපාලන කණ්ඩායම් අමතමින් චාවේස් කියා සිටියේ පෙරට වඩා ඔවුන් සමඟ එක් වී සමීපව කටයුතු කිරීමට තමන් සූදානම් බවය. ඔපෙක් සංවිධානයේ සාමාජික රටක් ද වන වෙනිසියුලාව ලතින් ඇමෙරිකා කලාපයේ ඉහළට ඔසවා තැබීමට තමා අපේක්ෂා කරන බවත් ඊට කැප්රිලේ ඇතුළු විපක්ෂ දේශපාලන කණ්ඩායම් සමඟ එක් වී කටයුතු කරන බවත් චාවේස් අවධාරණය කරයි. වෙනිසියුලාවේ ජනපති ධුර කාලය වසර හයක් වන අතර චාවේස් ජනපති ධුරයේ රැඳී සිටින්නේ 1996 වසරේ සිටය. ඇමෙරිකාව ප‍්‍රමුඛ බටහිර රටවල විවේචනයට ලක් වන ඔහු වචනයේ පරිසමාප්තියෙන්ම සමාජවාදී නායකයකු යැයි ලතින් ඇමෙරිකානු දේශපාලන විචාරකයෝ පෙන්වා දෙති.  පිළිකාවකින් ද පීඩා විඳ, ප‍්‍රතිකාර ලබා එය ජය ගැනීමට චාවේස් සමත් වීම ද සුවිශේෂී සිදුවීමකි.චාවේස් තම පක්ෂ ආධාරකරුවන්ට අතවනමින්