ආරක්ෂක අංශ සහ සටන්කාමීන් අතර සිකුරාදා (10) ඇති වූ ගැටුම් වලින් මියගොස් ඇත්තේ ශ්‍රීනගර් නගරයට එල්ල වූ ප්‍රහාර රැසක මොළකරු යැයි ඉන්දීය පොලිසිය කියයි.

දකුණු කාශ්මීරයේ ෂොපියාන් හීදී ඇතිවූ එම ගැටුම්වලින් මියගොස් ඇත්තේ ජම්මු සහ කාශ්මීරයේ අයි.එස් සංවිධානයේ ප්‍රධානියා යැයි සැළකෙන සකීර් මූසා සමඟ සමීප සබඳතා පැවැත්වූ සටන්කාමියකු වන ඉෂ්ෆාක් අහමද් සෝෆී නමැත්තා බව ද පොලිසිය සඳහන් කරයි.

පසුගිය කාලයේ දී ශ්‍රීනගර් නගරයට එල්ල වූ ප්‍රහාර රැසක් සැලසුම් කර ඇත්තේ මොහු බව ද ඔහු උමාර් යන නමෙන් ද හඳුන්වන බව ද ඉන්දීය පොලිසිය පවසයි.

ජම්මු සහ කාශ්මීර්හී බරමුල්ලා දිස්ත්‍රික්කයේ සෝපෝර්හි බී ආදර්ශ ගම්මානයේ පදිංචිකරුවකු බව කියන සෝෆී 2015 වසරේ සිට හර්කාත් උල් මුජහිදීන් නමැති සංවිධානය සමඟ සමීප සබඳතා පවත්වා ඇතැයි ද ඉන්දීය පොලිසිය කියයි.

අල් කයිඩා සංවිධානයේ හිටපු නායක ඔසාමා බින් ලාඩන් සමඟ සමීප සබඳතා පැවැත්වූ බව කියන එම සංවිධානය පාකිස්තානය කේන්ද්‍ර කරගනිමින් ක්‍රියාත්මක වන්නකි. එසේ වුවත් එම සංවිධානයේ වැඩි වශයෙන් සක්‍රීයව ඇත්තේ කාශ්මීරයේය. එක්සත් ජාතීන්ගේ සංවිධානය, ඇමෙරිකා එක්සත් ජනපදය සහ එක්සත් රාජධානිය මෙම සංවිධානය ත්‍රස්ත සංවිධානයක් ලෙස නම් කර ඇත.

සෝෆී 2016 වසරේදී පොලිස් අත්අඩංගුවට පත්ව තිබෙන අතර 2018 දී ඇප මත මුදා හැර ඇතැයි ද පොලිසිය කියයි. සෝෆී ඇතුළු සටන්කාමීන් පිරිසක් හර්කාත් උල් මුජහිදීන් සංවිධානයෙන් ඉවත් වී ජම්මු සහ කාශ්මීරයේ අයි.එස්. සංවිධානය එක්වී ඇති අතර එහි නායක සකීර් මූසා සමඟ සමීප සබඳතා පවත්වා ඇත. 

 ද හින්දු ඇසුරිනි 
 (ඡායාරූප ඒ.එෆ්.පී)

 055