ලෝ සුපතළ ෆෝබ්ස් සඟරාව, 2012 වසර සඳහා ලොව බලවත්ම කාන්තාවන් 100 දෙනාගේ නම් ලැයිස්තුව පෙරේදා (22) ප‍්‍රකාශයට පත් කළ අතර එහි පළමු සහ දෙවැනි ස්ථාන හිමිකර ගෙන සිටින්නේ ජර්මන් චාන්සල්වරිය ඇන්ජෙලා මාකෙල් ඇමෙරිකානු රාජ්‍ය ලේකම් හිලරි ක්ලින්ටන්ය. ව්‍යාපාරික සඟරාවක් වන ෆෝබ්ස් සඟරාව විසින් සෑම වසරකම ලොව ප‍්‍රබලතම කාන්තාවන් 100 දෙනකු තෝරනු ලබයි. දේශපාලන, ව්‍යාපාරික, මාධ්‍ය, ආදී විවිධ ක්ෂේත‍්‍ර කිහිපයකින් එම 100 දෙනා තෝරා ගැනෙයි. ජර්මන් චාන්සලර් ඇන්ජෙලා මාකෙල් ඉකුත් වසරේ ද පළමු ස්ථානයට පත් වූවාය. යුරෝපය මුහුණ දී සිටින ආර්ථික අර්බුදය හමුවේ යුරෝපා සංගමය ඉදිරියට ගෙන යෑමට ඇයගෙන් සිදුවන මෙහෙවර ඇඟයීමට ලක් කරමින් ෆෝබ්ස් සගරාව ඇය පළමු තැනට පත් කර ඇත. මේ වසරේ තෙවැනි ස්ථානයේ සිටින්නේ බ‍්‍රසීලයේ ජනාධිපති දිල්මා රූසෙෆ්ය. ඊට අමතරව ඇමෙරිකා ජනපති ආර්යාව මිෂෙල් ඔබාමා, ඉන්දියාවේ කොංග‍්‍රස් පක්ෂ නායිකා සෝනියා ගාන්ධි, පොප් ගායිකා ලේඞී ගාගා සහ ජෙනිෆර් ලෝපෙස් ද එම ප‍්‍රබල කාන්තාවන් 100 දෙනා අතර සිටිති.