ලොව  ඕනෑම තැනක සිටින ඇමෙරිකා හමුදා බලඇණියකට පහර දීමට තමන්ට ශක්තියක් ඇතැයි රුසියාවේ සිටින ඉරාන තානාපතිවරයා අනතුරු අඟවයි. ඉරාන තානාපති සයීඞ් මහ්මූද් රේසා මේ බව කියා සිටියේ රුසියාවේ ඉන්ටර්ෆැක්ස් පුවත් ආයතනය සමඟ සම්මුඛ සාකච්ඡාවකට එක් වෙමිණි. තම රටට එරෙහිව ප‍්‍රහාරයක් එල්ල කරන  ඕනෑම විදේශයකට ප‍්‍රතිප‍්‍රහාර එල්ල කිරීමට පැකිලෙන්නේ නැතැයි ඉරාන විප්ලවීය හමුදාව ද අනතුරු ඇඟවීමක් කර තිබේ. ඉදිරි මාස කිහිපයේදී ඊශ‍්‍රායලය නිසැකවම ඉරානයට ප‍්‍රහාරයක් එල්ල කරාවි යැයි ඇමෙරිකාව පවසා ඇති අතර රුසියාවේ ඉරාන තානාපතිවරයා අවධාරණය කළේ ඇමෙරිකාවේ ‘උසි ගැන්වීමෙන්’ ඊශ‍්‍රායලය සිදු කරන  ඕනෑම ප‍්‍රහාරයකට තමන් නොබියව මුහුණ දෙන බවය. ඉරානය මේ වනවිටක් තම හමුදා ශක්තිය ලෝකයට ප‍්‍රදර්ශනය කිරීමේ අරමුණින් ගොඩබිම් යුද අභ්‍යාසයක් ද ආරම්භ කර තිබේ. නවීන අවි ආයුධ සහ මිසයිල අත්හදා බලන බව ඉරාන විප්ලවීය හමුදාව පවසයි. ඉරානය මීට පෙර හෝමූස් සමුද්‍ර සන්ධියේදී පැවැත් වූ නාවික අභ්‍යාසය ඇමෙරිකාව, ඊශ‍්‍රායලය ඇතුළු බටහිර රටවල දැඩි විරෝධයට හේතුවක් විය. ඉරානය එම නාවික යුද අභ්‍යාස පැවැත්වූයේ ඇමෙරිකාව ප‍්‍රමුඛ බටහිර රටවලින් එල්ල වන තර්ජන ගර්ජන හමුවේ තමන්ට හෝමූස් සමුද්‍ර සන්ධිය වසා දමා ලෝක තෙල් සැපැයුමට බාධාවක් එල්ල කළ හැකි යැයි පෙන්වීමටය. ඉරානය, ඇමෙරිකාව සහ බටහිර ලෝකයේ උදහසට ලක්වී සිටින්නේ ඔවුන්ගේ හිතුවක්කාර න්‍යෂ්ටික වැඩසටහන නිසාය.