තවමත් ආගිය අතක් සොයාගත නොහැකිව තිබෙන මලයාසියා ගුවන්සේවයට අයත් එම්.එච් 370 අංක දරන ගුවන්යානයේ සිටි මගීන්ගේ බැංකු ගිණුම් වලින් අයථා ලෙස මුදල් ලබා ගත් බව කියන බැංකු නිළධාරිනියක හා ඇයගේ සැමියා මලයාසියා පොලිසියෙන් සැක පිට අත්අඩංගුවට ගනු ලැබුහ.

මගීන්ගේ ගිණුම් වලින් මුදල් අතුරුදන් වෙමින් තිබෙන්නේයැයි ලැබුණු තොරතුරක් මත පරීක්ෂණ සිදුකැරිණි.

මගීන් කොහේ හෝ ජීවතුන් අතර සිටින්නේයැයි නව බලාපොරොත්තුවක් මේ සමග ඇතිවුණද එය අවසානයේ දී බොඳ වී ගියේය.

පොලිස් ආරංචි මාර්ග වලට අනුම මේ සැමියා හා බිරිඳ මගීන් තිදෙනෙකුගේ බැංකු ගිණුම් වල තිබූ මුදල්,තවත් මගියෙකුගේ ගිණුමට බැර කොට අනතුරුව එම මගියාගේ ගිණුම අත්හිටුවා දමා එහි වූ සියලූ මුදල් ලබාගෙන තිබේ.

ලබාගෙන ඇති මුදල ඩොලර් 30000 කට  (රුපියල් 3930000) ආසන්නය.                                                                   

මෙලෙසම අයථා ලෙස යානයේ සිටි මගීන්ගේ බැංකු ගිණුම් වලින් මුදල් ලබාගෙන තිබෙන පකිස්තාන ජාතිකයෙකු සොයාද පොලිස් පරීක්ෂණ කි‍්‍රයාත්මකය.

මගීන් හා කාර්යමණ්ඩලය ඇතුලූ 239 දෙනෙකු සමග මලයාසියාවේ ක්වාලාලම්පූර් සිට චීනයේ බීජිං බලා පියාසර කරමින් තිබියදී පසුගිය මාර්තු මාසයේදී අතුරුදන්වූ එම්.එච් 370 අංක දරන ගුවන්යානය පිළිඹද මේ දක්වාම කිසිදු තොරතුරක් සොයාගැනීමට හැකිව නොමැත.

යානය අතුරුදන්වූ ඉන්දියා සාගර කලාපයේ විමර්ෂණ කටයුතු තවමත් කි‍්‍රයාත්මකව පවතින අතර මේ වන විට මුහුද මතුපිට වර්ග කිලෝමිීටර 60000 කට ආසන්න වපසරියක් ආවරණය කර ඇතැයි සදහන්ය.

එළැඹෙන සැප්තැම්බර් මාසයේ සයුරු ගැඹුරේ විමර්ෂණ කටයුතු ආරම්භ කිරීමට නියමිතය.