ලෝකයේ ප්‍රසිද්ධම බොක්සිං ක්‍රීඩක මොහොමඩ් අලි අද   (4) අභාවප්‍රාප්ත විය.

ඔහු ඇමෙරිකාවේ ඇරිසෝනා ප්‍රාන්තයේ රෝහලක ප්‍රතිකාර ලබමින් සිටිය දී අභාවප්‍රාප්ත වූ බව විදෙස් මාධ්‍ය වාර්තා කරයි. පාර්කින්සන් නම් රෝගය නිසා ප්‍රතිකාර ලැබූ ඔහු  ශ්වශන අබාධයකින්ද පෙළුණු බව ද සදහන් වේ.

ඇමෙරිකා  ජාතිකයෙකු වන ඔහුගේ මුල් නම කැෂියස් මාසලස් ක්ලේ ය. පසු කාලීනව කැෂියස් ක්ලේ නම ඉවත් කර මොහොමඩ් අලි නමින් ඉස්ලාම් ආගමිකයෙකු බවට පත්විය.

ඔහු මොහොමඩ් අලි යන නම බොක්සිං ක්‍රීඩාවට උරුම කළේය. ඔහු 1960 දී රෝමයේ ලෝක බොක්සිං ශුරතාවය දිනාගෙන තම අනසක පැතිරවීම ආරම්භ කළේය. එමෙන්ම තවත් අවස්ථා හතරක දී ලෝක බොක්සිං ශුරතාවලි ජයගනිමින් බොක්සිං ලෝකයේ ශ්‍රේෂ්ඨතමයා බවට පත් විය.

තරග 61කින් 56ක් ජයගත් හෙතෙම 1981 දී විශ්‍රාම සුවය විදීමට ක්‍රීඩාවෙන් සමු ගත්තේය.

ඔහු බොක්සිං ශුරයෙකු මෙන්ම වර්ගවාදය වැලැක්වීම සදහා සටන් කළ මානව හිමිකම් ක්‍රියාකරුවෙකු ද විය.   2012 ලන්ඩනයේ පැවති ඔලිම්පික් තරඟාවලිය ආරම්භ කිරීම සඳහා ඔලිම්පික් පහන ද දැල්වීමට ද එක් විය.

ඇමෙරිකා  වියට්නාම් යුද්ධයට සහය පල නොකිරීම හේතුවෙන් ඔහුට සිර දඩුවම් විදීමට ද සිදු වූ අතර ඉන් බොක්සිං ක්‍රීඩාව ද තහනම් වූ හෙතෙම සිර දඩුවමින් නිදහස් වූ පසු නැවත තම කිර්ති නාමය ලබාගැනීමට සටන් කළේය.

ඉන් පසු ඔහු ලොව ප්‍රසිද්ධ තරුවක් වීම සදහා සුවිශේෂී තරග රැසකට සහභාගී විය.

 ලෝක බොක්සිං ශුරයා මිය යන විට වයස 74 පසු කරමින් සිටියේය.

අවසන් කටයුතු ඔහුගේ උපන් නගරය වන ලුයිස්විල් නගරයේදී සිදු වෙනු ඇතැයි සදහන් වේ.'