මොංගෝලියා පාර්ලිමේන්තුවේ කතානායක එන්ක්බෝල්ඞ් මීගොම්බෝ මහතාට එරෙහිව විශ්වාසභංගයක් සම්මත කරගැනීමට එරට පාර්ලිමේන්තු මන්ත්‍රීවරු අද (29) පියවර ගත්හ.

කතානායක එන්ක්බෝල්ඞ් මීගොම්බෝට දූෂණ චෝදනා එල්ල වී තිබෙන අතර ඉල්ලා අස්වෙන්නැයි බොහෝ පාර්ශව ඔහුට බල කර සිටියත් හෙතෙම ඊට කන් නොදුන්නේය. මේ අනුව පාර්ලිමේන්තුට විශ්වාසභංගයක් ගෙන ඒමට මන්ත්‍රීවරුන් කටයුතු කළ අතර එම විශ්වාසභංගය පාර්ලිමේන්තුවේදී සම්මත විය. 

එන්ක්බෝල්ඞ් මීගොම්බෝ හිටපු ජනාධිපති අපේක්ෂයකු මෙන්ම එරට හිටපු අග්‍රාමාත්‍යවරයකු ද වේ. 

කතානායකවරයා ඉල්ල අස්වෙන්නැයි බල කරමින් පාර්ලිමේන්තු මන්ත්‍රීවරුන් පස් දෙනකු දැවැන්ත විරෝධතා ව්‍යාපාරයක් දියත් කළ  අතර ඔවුන් තවත් මන්ත්‍රීවරු පිරිසක් හා එක්ව පාර්ලිමේන්තුව වර්ජනය කළහ.

මේ හේතුවෙන් මසකට ආසන්න කාලයක් පාර්ලිමේන්තුවේ කටයුතු අකර්මණ්‍ය වී තිබිණි. පසුගිය වසරේ දෙසැම්බර් මාසයේදීත් මේ මාසයේදීත් වංචා දූෂණ සහ රාජ්‍ය මුදල් වංචා කිරීම් යනාදියට විරෝධය පළ කරමින් මොංගෝලියාවේ නගර කිහිපයකම විරෝධතා පැවැත්විණි. දහස් ගණනක් ඊට සහභාගී වූහ. 

මොංගෝලියාවේ කතානායක එන්ක්බෝල්ඞ් මීගොම්බෝ ආණ්ඩුවේ තනතුරු විකුණානමින් අයථා ලෙස මුදල් උපයා ඇති බවත් එක්සත් ජනපද ඩොලර් මිලියන 24ක් මුදලක් සොයාගැනීම සඳහා නියෝජ්‍ය අමාත්‍ය සහ රාජ්‍ය ලේකම් යන තනතුරු මුදලට විකුණා ඇති බවටත් චෝදනා එල්ල වී තිබේ. 

එන්ක්බෝල්ඞ් මීගොම්බෝ 2017 වසරේ පැවැති ජනාධිපතිවරණයට ඉදිරිපත් වූ අතර ඔහු එයින් පරාජයට පත්වූයේය. ජනාධිපතිධුරයට පත්වූයේ කල්ට්මා බට්ටුලාගාය. කල්ට්මා මේ මස මුලදී කතානායකවරයා බලයෙන් පහ කළ හැකි පරිදි නව නීතියක් ද හඳුන්වා දුන්නේය. 

ඒ.එෆ්.පී. ඇසුරිනි

055