ඇමෙරිකා ජනාධිපතිවරණයේදී කරට කර සටනක් දීමට සමත් රිපබ්ලිකන් අපේක්ෂක මිට් රොම්නි වෙනුවෙන් රාතී‍්‍ර භෝජන සංග‍්‍රහයක් පැවැත්වීමට ජනපති ඔබාමා බලාපොරොත්තු වන බව ධවල මන්දිරය ඊයේ (29) නිවේදනය කළේය. ජනපතිවරණයෙන් පසු ඔබාමාත් රොම්නිත් මුහුණට මුහුණ එකිනෙකා හමුවන පළමු අවස්ථාව මෙය බවත් ධවල මන්දිර ප‍්‍රකාශක ජේ කානී මාධ්‍ය හමුවේ පැවැසීය. ජනපතිවරණයට පෙර සිට ඔබාමා මැතිවරණ වේදිකාවේ කියා සිටියේ තමා යළි ජයග‍්‍රහණය කළහොත් රිපබ්ලිකන් පක්ෂය සමඟ සමීපව කටයුතු කරන බවත් ඔවුන්ගේ සහාය ඇතිව ඇමෙරිකාව නව දේශපාලන ගමන් මඟකට යොමු කරවන බවත්ය. එම ඡන්ද පොරොන්දුව ඉටු කරමින් ඔබාමා ප‍්‍රතිවාදී රිපබ්ලිකන් පක්ෂය සමඟ සමීපව කටයුතු කිරීමට සූදානම් වීම ප‍්‍රසංශනීය යැයි දේශපාලන විචාරකයෝ පෙන්වා දෙති.