රුසියාවේ අවි ආයුධ ගනුදෙනු පිළිඹඳ සීමා පැනැවිය හැක්කේ එක්සත් ජාතීන්ගේ ආරක්ෂක මණ්ඩලයට පමණක් බව රුසියා ජනපති ව්ලැදිමිර් පූටින් කියයි. ඔහු මේ බව කීවේ රුසියාව සිරියාව සමග කැරෙන අවි ආයුධ ගනුදෙනු ගැන බටහිර රටවල් න`ගන චෝදනා වලට පිළිතුරු බැඳීමක් ලෙසය. එක්සත් ජාතීන්ගේ සංවිධානය සිරියාවට පනවන සම්බාධක අනුව එරට සමග රුසියාව කරන ගනුදෙනු සීමා කිරීමට තමන් කටයුතු කරන බව පූටින් පවසයි. එතෙක් රුසියාව ගනුදෙනු කළ යුත්තේ කා සමගද හා කෙසේද යන්න ගැන කිසිවකුගේවත් උපදෙස් අනවශ්‍ය බව ඔහු කියයි. රුසියාවෙන් පසුගිය වසරේදී සිරියාව මිලදී ගත් අවි ආයුධ වල වටිනාකම ඩොලර් සිය කෝටියක් ( රුපියල්  කෝටි 13200)ඉක්මවයි. සිරියාව සමග කැරෙන ආයුධ ගනුදෙනු සාධාරණීකරණය කරමින් රුසියාව පවසන්නේ සිරියා කැරලිකරුවන් නීති විරෝධී ලෙස ආයුධ  සපයා ගන්නා බැවින් රජයට ආධාර කිරීමේ වරදක් නොමැති බවයි. රුසියාව කිසි විටෙකත් සිවිල් යුද්ධයක් ඇති කිරීමේ අරමුණින් සිරියාවට අවි ආයුධ අලෙවි නොකරන බව පූටින් අවධාරණය කරයි.