ප‍්‍රචණ්ඩ කි‍්‍රයා රැසකට සම්බන්ධ පාකිස්තානයේ අල් කයිඩා නායක බඩාර් මන්සූර් මරා දැමීමට ඇමෙරිකන් හමුදාව ඊයේ (9) සමත්විය. ඇෆ්ගන්/පාකිස්තාන දේශසීමාව අසල උතුරු වසිරිස්තානයේ මිරන්ෂා නුවර සැඟවී සිටි මන්සූර්, මියගියේ නියමුවන් රහිත ඩ්‍රෝන යානා යොදා ගනිමින් එල්ල කළ ප‍්‍රහාරයකදී යැයි ඇමෙරිකා හමුදාව පවසයි. බුද්ධි අංශ තොරතුරු පාදක කර ගනිමින් ඇමෙරිකන් හමුදාව මන්සූර් සැඟවී සිටි නිවසට පහර දුන්නේ ඊයේ අලූයමය. ප‍්‍රහාරයෙන් තවත් අල් කයිඩා සටන්කාමීන් සිවු දෙනෙක් ජීවිතක්ෂයට පත්වූහ. මන්සූර් මියගිය බව මේ වනවිට තහවුරු වී ඇති බවත් අල් කයිඩා සටන්කාමීන්ගේ පණිවුඩ හුවමාරුවලට හොරෙන් කන් දී ඒ බව සැක හැර දැනගත් බවත් පාකිස්තාන රජය ද පවසා ඇත. පාකිස්තානයේ සැඟවී සිටි අල් කයිඩා නායක ඔසාමා බින් ලාඩන් ඝාතනය කිරීමෙන් පසු ඇමෙරිකාව ඉස්ලාමීය සටන්කාමීන් ජේෂ්ඨ නායකයකු ඝාතනය කළ දෙවැනි අවස්ථාව මෙයයි. මීට පෙර ඔවුන් ඇෆ්ගන් තලේබාන් නායකයා ද ඩ්‍රෝන යානා යොදා ගනිමින් ඝාතනය කළේය. ඇමෙරිකා හමුදා බින් ලාඩන් ඝාතනය කළේ පාකිස්තාන රජයට නොදන්වාය. ඒ, පාකිස්තාන රජයේ ඇතැම් නිලධාරීන් අල් කයිඩා සාමාජිකයන් සමඟ සම්බන්ධකම් පවත්වන බව හෙළි තහවුරු වී ඇති නිසාය. ඉකුත් නොවැම්බරයේදී ඇමෙරිකා ඩ්‍රෝන යානා ප‍්‍රහාරයකින් පාකිස්තාන/ඇෆ්ගන් දේශසීමාවේ මුරපොළක සිටි පාකිස්තාන හමුදා සෙබළු 24 දෙනෙක් ජීවිතක්ෂයට පත්වූහ. එම සිදුවීමත් සමඟ ඇමෙරිකාව සහ පාකිස්තානය අතර ඇයිහොඳයිකම් පළුඳු විය.