දෑත් නැතැත් ප්‍රශ්නයක් නෑ

දෙඅත් නැතත් උත්සාහයෙන් ජීවිතය ජයගන්නට වෙර දරන දෙදෙනෙකි ලින්ඩා බැරන් හා ඇයගේ පුතු ටිමි.

ඇමරිකාවේ චිකාගෝ නුවර වාසය කරන ලින්ඩා හට උපතින්ම දෙඅත් අහිමිය.වෛද්‍යවරුන් ඇයගේ තත්ත්වය නීර්ණය කර ඇත්තේ ප‍්‍රවේණිගත රෝගයක් ලෙසටය.

නමුත් ඇය දෙඅත් නොමැතිවීම ජීවිතයට බාධාවක් කරගෙන නැත.වයස අවුරුදු 12 වන විටදී ඇයගේ වයසේ  ඕනෑම කුඩා දැරියක මෙන් ඇඳුම් පැළඳුම් තමන්ම ඇඳ ගැනීමට,නෑමට,පිහිනීමට,සෙල්ලම් කිරීමට ආදී සියලූදේ තමන්ට කිරීමට හැකිවූ බව ඇය කියන්නීය.

‘‘අත් දෙක නැතත් මට කකුල් දෙකක් තිබුණානේ.මම ඒවායෙන් වැඩ කරගන්න පුරුදුවුනා.මුලදී අමාරු වුනත් පස්සේ මට එදිනෙදා වැඩ ඔක්කොම කරගන්න හැකිවුනා‘‘ ඇයගේ වචන වල තමන් ගැන සියුම් ආඩම්බරයක්ද ඇත.

වයස අවුරුදු 24 දී විවාහ වී ඇති ඇය දරුවකු සාදා ගැනීමට තිරණය කර තිබෙන අතර වෛද්‍යවරු ඇයට අනතුරු අගවා ඇත්තේ ඇයගේ රෝගී තත්ත්වය දරුවාටද ලැබිය හැකි බවටයි.

නමුත් දරුවෙකු ලැබීමේ නොතිත් ආශාවෙන් සිටි ඇය අවදානම භාරගෙන ඇත්තීය.ඇයගේ සැමියාද ඇයට හොද සහයෝගයක් වී ඇත.

වෛද්‍යවරු මත පල කළ ආකාරයටම ඇයගේ දරුවා වන ටිමි උපත ලැබුවේද දෙඅත් නැතිවය.නමුත් ඇය නොසැලූනාය.

‘‘මට හොද සහයෝගයක් ලැබුණා මගේ දෙමව්පියන්ගෙන්.ඉතින් මම හිතාගත්තා මමත් ඒ වගේම මගේ දරුවා වෙනුවෙන් කැප වෙනවා කියලා.‘‘ ලින්ඩා පවසන්නීය.

ඇයගේ කැපවීමේ ප‍්‍රතිඵල අද දිනයේ දක්නට ඇත.ටිම්ට දැන් වයස අවුරුදු 9 කි.ඔහුගේ වයයේ  ඕනෑම කොලූ ගැටයෙකුට මෙන් සෙල්ලම් කිරීමට,පිහිනීමට, පරිගණකය භාවිතා කිරීමට,වෙනකක් තියා ගිටාරය පවා වාදනය කිරීමට ඔහුට හැකිය.

මේ සියලූදේට ඔහු තම මව මෙන්ම යොදාගන්නේ තම පාදයන්ය.

‘‘මුලින්ම ටිමි ජීවත් වෙයි කියලා අපේ විශ්වාසයක් තිබුණේ නැහැ.මොකද ඔහු උපත ලැබූ ගමන්ම හදවතේ සිදුරක් තිබෙනවා කියලා හදුනාගන්න හැකිවුනා.උපත ලබලත් මාස ගානක් රෝහලේ ගත කරලා තමයි ඔහු ගෙදර ආවේ.ඒත් දැන් ඔහු සාමාන්‍ය ළමයෙක් වගේම තමයි හැසිරෙන්නේ.‘‘ ලින්ඩා කියන්නීය.

ටිමිගේ අදිටන හොදින් ඉගෙන ගෙන ඉහළටම යෑමටය.ඔහුට එයට ශක්තිය තිබෙන බව නම් සහතිකය.

ටිම් හා ලින්ඩා වැනි පුද්ගලයෝ ලොව අනන්තවත් සිටින මුත් ඔවුන්ගේ ආදර්ශය ගෙන දෑත දෙපා හොදින් තිබෙතත් අනුනට අත පාන බහුතරය තම පිළිවෙත් වෙනත් කර ගැනීමට කටයුතු නොකිරීම කණගාටුවට කරුණකි.