හදිසි රථ වාහන පරීක්ෂාවක නිරතව සිටි චීනයේ හුඛෙයි ප්‍රාන්තයේ සියැන්ටෝ නගර පොලිසිය දෙඅතම අහිමිල දෙපයේ ආධාරයෙන් මෝටර් රථය පදවමින් සිටි පුද්ගලයෙකු අත්අඩංගුවට ගත්හ.

වෝ ගුවෝ නම් වූ මේ පුද්ගලයා හදිසි අනතුරකින් තම දෙඅතම අහිමි වුනේ යැයි පොලිස් නිළධාරීන් හමුවේ පැවසීය.තම මිතුරෙකු තමන්ට රිය පැදැවීමේ මූලික කරුණු කියා දුන් බවත් පසුව දෙපයින් රිය පැදැවීමට පුහුණු වුනු බවත් ඔහු කීය.

වම් පයේ ඇගිලි වලින් සුක්කානම රදවා තබා ගැනීම හා කරකැවීම සිදුකරන අයුරුත් දකුණු පයෙන් වේග හා තිරිංග පැඩලයන් පාගන අයුරුත් ඔහු පෙන්වීය.

මෝටර් රථය කිලෝ මිීටර ලක්ෂයක් පදවා ඇතැයි එහි මීටර පුවරුවේ සදහන්ව තිබුණි.ඒ මුලූ දුර මෝටර් රථය පැදවූයේ තමන් යැයිද මේ දක්වා කිසිදු අනතුරක් සිදුවූයේ නැතැයි යැයිද ගුවෝ පැවසුවේය.

කෙසේනමුත් රියැදුරු බලපත්‍රයක් නොතිබුණු හෙයින් ගුවෝ අත්අඩංගුවට ගැනීමටත් මෝටර් රථය තමන් භාරයට ගැනීමටත් පොලිස් නිළධාරීහු කටයුතු කළහ.

ඔහුගේ ධෛර්යය ඉතා මහත් කොට සළකන්නේ වුවත් ඔහු සිටින තත්ත්වය අනුව මාර්ගයේ අනෙක් රියැදුරන්ට ඔහු මාරකයක් වනු ඇතැයි යන අවදානම බැහැර කළ නොහැකි බවත් මෙනිසා ඔහු රිය පැදැවීමට කුලී රියැදුරෙකු යොදාගැනීමට එකග වන්නේ නම් පමණක් ඔහුගේ මෝටර් රථය නැවත ඔහුට ලබා දෙන බවත් පොලිස් බළධාරීහු පැවසූහ.