නුදුරු අනාගතයේදී අගහරු මතට යන ගගනගාමීන්ගේ කණ්ඩායමට ඇතුළත් වීමට තමන්ද දැඩි කැමැත්තකින් සිටිනා බව අභ්‍යාවකාශය තරණය කළ ලොව ප‍්‍රථම කාන්තාව වන වැලෙන්ටිනා තෙරෙස්කෝවා පවසන්නීය.

ඇගේ වයස දැන් අවුරුදු හැත්තෑ හයකි.සිය දිවියේ අවසන් භාගය අභ්‍යාවකාශ චාරිකාවක් වෙනුවෙන් වැය කිරීමට හැකියාව ලැබෙන්නේනම් තමන්ට ඊට වඩා සතුටක් නැතැයි ඇය කියන්නීය.අගහරු මතට යන ගමනේ ආපසු පෘථිවියට පැමිණීමක් නොමැති බව තමන් දන්නා බවද තම ප‍්‍රියතම ග‍්‍රහලෝකය වන අගහරු තරණය කිරීමට අවස්ථාව ලැබෙන්නේ නම් එම අවදානමද භාරගැනීමට තමන් සූදානම් බවද ඇය පවසයි.

ආධුනික පැරෂූට්වරියක වූ වැලෙන්ටිනා එදවස සොවියට් සංගමයේ අභ්‍යාවකාශ වැඩසටහනට ඇතුළත් කර ගන්නා විට ඇය 26 හැවිරදි තරුණියකි.අභ්‍යාවකාශය තරණය කිරීමට තවත් තරුණියන් තිදෙනෙකු සමග රුසියානු විද්‍යාඥයන් යටතේ පුහුණුව ලබා අවසන දස්කම් පෙන්වා අභ්‍යාවකාශය තරණය කිරීමේ වාසනාව හිමි කර ගැනීමට ඇය සමත් වූවාය.

සෝවියට් සංගමය නිපැදවූ වොස්ටොක් 6 යානයෙන් අභ්‍යාවකාශයට ගිය ඇය දින තුනක් පුරාවට අභ්‍යාවකාශයේ රැුදෙමින් පෘථිවිය වටා වට 48 ක් ගමන් කළාය.නිරුපද්‍රිතව යළි පෘථිවිය කරා පැමිණි ඇය සොවියට් සංගමයේ වීරයා යන සොවියට් සංගමය විසින් පිරිනැමූ ඉහළම සම්මානයෙන්ද පිදුම් ලැබුවාය.

මෙම මස 16 වන දිනට ඇය අභ්‍යාවකාශයට ගොස් වසර 50 ක් සපිරේ.නැවත වරක් සිය උපන් රටට ගෞරවයක් ගෙන දීම ඇයගේ අරමුණයි.