කියුබාවේ හවානා නුවරදී පිළිකා සැත්කමකට භාජන වී යළි වෙනිසියුලාවට පැමිණි එරට සමාජවාදී නායක හියුගෝ චාවේස්ගේ සෞඛ්‍ය තත්ත්වය අයහපත් බව වෙනිසියුලානු රජය ඊයේ (5) නිවේදනය කළේය.
එම කනගාටුදායක පුවත ඇසීමෙන් වෙනිසියුලා ජනතාව කම්පනයට පත් ව ඇතැයිද එරට මාධ්‍ය වාර්තා කරයි. වෙනිසියුලාවේ විපක්ෂ දේශපාලන කණ්ඩායම් පවසන්නේ චාවේස් මියගොස් ඇති බවත් රජය එය වසං කරන බවත්ය.
පිළිකා සැත්කමින් පසු චාවේස් පෙනහළු ආසාදනයකට ලක් විය. වෙනිසියුලා රජය පැවැසුවේ මේ වනවිට එම පෙනහළු ආසාදනය උග‍්‍ර අතට හැරී ඇති බවය.
කියුබාවේ හවානා නුවරදී පිළිකා සැත්කමකට භාජන වී මාස දෙකකට ආසන්න කාලයක් අසාධ්‍ය තත්ත්වයේ පසු වූ චාවේස් යළි වෙනිසියුලාවට පැමිණියේ ඉකුත් 18 වැනිදාය.
කැරකස් නුවරට ගෙනා චාවේස් වහාම හමුදා රෝහලකට ඇතුළත් කෙරුණි. තම ආදරණීය නායකයා යළි පැමිණෙනු දැක ගැනීමට මිලියන හතරකට වැඩි පිරිසක් කැරකස් නුවරත් එරට ජාත්‍යන්තර ගුවන් තොටුපොළටත් රැස්ව සිටියහ. එහෙත් ඔවුන්ට චාවේස් දැක ගැනීමට අවස්ථාවක් නොලැබිණි.