තායිපේහිදීය (රොයිටර්)
 
ඓතිහාසික අමනාපකම් ඉවතලා චීනය හා තායිවානය අතර නව සබඳතා ආරම්භ කිරීමට කාලය උදා වී ඇතැයි තායිවාන ජනාධිපති ත්සායි ඉන් වෙන් පවසයි. 
 
චීනයේ පාලක කොමියුනිස්ට් පක්ෂය ෂී ජින්පින්ග් ඉදිරි වසර පහක කාලයට  නැවත වරක් එරට ජනාධිපතිවරයා ලෙස පත් වීමෙන් පසු හා එරට නව නායකත්ව මණ්ඩලය ප්‍රකාශයට පත් කිරීමෙන් පසු පළමුවරට අදහස් දක්වමින් තායිවාන ජනාධිපතිනිය ඒ බව කීවාය.
 
පසුගිය වසරේදී ත්සායි ඉන් වෙන්ගේ නායකත්වයෙන් යුතු ඩිමොක්‍රටික් ප්‍රෝග්‍රෙසිව් පක්ෂයට බලයට පත්වීමත් ඇය ජනාධිපතිධුරයට පත්වීමත් සමඟ චීන තායිවාන සබඳතා තවදුරටත් පළුදු විය. 
 
චීනය තායිවානයේ පෙර පැවැති ආණ්ඩුව සමඟ තරමක මිත්‍රශීලි ප්‍රතිපත්තියක් අනුගමනය කළ නමුත් ත්සායි ජනාධිපතිධුරයට පත්වීමත් සමඟ එය අනෙක් පැත්ත හැරිණි. ත්සායි බලයට පත්වීමත් සමඟ තායිවානයට යන චීන සංචාරකයන්ගේ සංඛ්‍යාවද ශීඝ්‍රයෙන් අඩු වී ඇතැයි වාර්තා වේ.
 
“වෙනසකට කාලය උදා වී තිබෙනවා. දීර්ඝ කාලයක් තිස්සේ තියෙන අමනාපකම්, නෝක්කාඩු නවතා දම දෙපාර්ශයේම ජනතාවගේ සුබසාධනය වෙනුවෙන් එකතුවීමට කාලය උදා වෙලා. සටන් වැදීම් සහ ගැටුම් සදහටම නවතා දැමිය යුතු” යැයි ද තායිවාන ජනාධිපතිනිය කීවාය. 
 
ෂී ජින්පින්ග් චීනයේ ජනාධිපතිවරයා ලෙස නැවත පත්වීම සම්බන්ධයෙන් තායිවාන ජනාධිපතිනිය විශේෂයෙන් කිසිවක් ප්‍රකාශ නොකළ නමුත්, චීනය කෙරෙහි තායිවානයේ තිබෙන හොඳ හිත කිසිවිටකත් වෙනස් නොවන බවත් තායිවානය කිසි ලෙසකින් වත් චීනයට පීඩනයක් එල්ල නොකරන බවත් ත්සායි අවධාරණය කළාය. 
තායිවානය තමන්ගේ රටේ කොටසක් යැයි චීනය සලකන අතර තමන් ස්වාධීන හා නිදහස් රටක් යැයි තායිවානය නිරන්තරයෙන් ප්‍රකාශ කරයි. මේ හේතුවෙන් දශක කිහිපයක් තිස්සේ දෙපාර්ශවය අතර මත ගැටුම් පවතියි. එපමණක් නොව චීනයේ, ‘එක් චීනයක’ ප්‍රතිපත්තිය හේතුවෙන් තායිවානය සමඟ රාජ්‍ය තාන්ත්‍රික සබඳතා පවත්වන්නේ රටවල් 30කටත් අඩු සංඛ්‍යාවක් පමණි. 
 
055