ඇෆ්ගනිස්තානයේ දකුණු කන්දහාරයේ පොලිස් මුරපොළකට ඊයේ (31) එල්ල වූ මරාගෙන මැරෙන බෝම්බ ප‍්‍රහාරයකින් එහි සිටි නිලධාරීන් පස් දෙනකු ජීවිතක්ෂයට පත් වූ අතර සත් දෙනෙක් තුවාල ලැබූහ. ප‍්‍රහාරය එල්ල වූයේ ආර්ගිස්තාන් පිහිටා ඇති පොලිස් මුරපොළටය. බෝම්බකරු මෝටර් රථයකින් පැමිණි බවත්, පොලිස් නිලධාරීන් ඔහු පරීක්ෂා කිරීමට සැරසෙද්දී බෝම්බය පුපුරුවා ගෙන ඇති බවත් වාර්තා වේ. තුවාල ලැබූ පොලිස් නිලධාරීන් තිදෙනකුගේ තත්ත්වය බරපතළ යැයි රෝහල් ආරංචි මාර්ග පවසයි. ප‍්‍රහාරයේ වගකීම තවමත් කිසිවකු විසින් බාර ගනු ලැබ නොමැති නමුත් එය තලේබාන් සටන්කාමීන්ගේ සැහැසි කි‍්‍රයාවක් යැයි ඇෆ්ගන් අභ්‍යන්තර කටයුතු අමත්‍යාංශය පවසයි. ඇෆ්ගනිස්තානයේ තලේබාන් සටන්කාමීහු නිරන්තරයෙන් එරට ආරක්ෂක අංශ ඉලක්ක කරගෙන ප‍්‍රහාර එල්ල කරති. කන්දහාරයේ ප‍්‍රචණ්ඩ කි‍්‍රයා පසුගිය මාස කිහිපයේ ඉහළ ගිය බව ද ඇෆ්ගන් අභ්‍යන්තර කටයුතු අමත්‍යාංශය වැඩි දුරටත් කියා සිටී.