ඇෆ්ගනිස්තානයේ බල්කා ප‍්‍රාන්තයේ සැඟවී සිටි තලේබාන් සංවිධානයේ ජ්‍යෙෂ්ඨ නායක සා ගූල් ඝාතනය කිරීමට ඇමෙරිකන් සහ ඇෆ්ගන් හමුදා සෙබළු ඊයේ (17) සමත් වූහ.
 තවත් තලේබාන් නායකයකු අත්අඩංගුවට ගැනීමට ද ආරක්ෂක අංශවලට හැකිවිය.
බුද්ධි අංශ තොරතුරුවලට අනුව ඇෆ්ගන් සහ ඇමෙරිකන් හමුදා සෙබළුන් සා ගූල් සැඟවී සිටි තිප්පොල සොයා වටළද්දී, සා ගූල් සහ ඔහුගේ ආරක්ෂාවට සිටි තලේබාන් සටන්කාමීන් ආරක්ෂක අංශ වෙත වෙඩි තබා ඇත.
එම අවස්ථාවේදී ආරක්ෂක පෙරළා පහර දුන් බවත් සා ගූල් සහ ඔහුගේ ආරක්ෂාවට සිටි තලේබාන් සටන්කාමීන් සිව් දෙනකු මරා දැමුණු බවත් පැවැසෙයි. සෙසු සටන්කාමීන් ආරක්ෂක අංශවලට යටත් වූ බවද වාර්තාවේ.  ඇමෙරිකා සහ ඇෆ්ගන් ආරක්ෂක අංශ එම ඒකාබද්ධ මෙහෙයුම සිදු කළේ පෙරේදා (16) උදේ විදෙස් හමුදා රථ පෙළකට කාබුල් නුවරදී  මරාගෙන මැරෙන බෝම්බ ප‍්‍රහාරයක් එල්ල වීමත් සමඟය.
එම ප‍්‍රහාරයෙන් ඇමෙරිකන් සෙබළු හය දෙනෙක් ජීවිතක්ෂයට පත්වූහ. ඇෆ්ගන් සෙබළුන් 10 දෙනකු සහ සිවිල් වැසියෝ 14 දෙනෙක් තුවාල ලැබූහ. තවත් සිවිල් වැසියෝ 8 දෙනෙක් ජීවිතක්ෂයට පත්වූහ.
එය තලේබාන් බෝම්බ ප‍්‍රහාරයක් බවත්, බෝම්බකරු ටොයෝටා කොරෝලා වර්ගයේ මෝටර් රථයකින් පැමිණ, විදෙස් හමුදා රථ පෙළ හරස් කොට සිය බෝම්බය පුපුරුවා ගෙන ඇති බවත් වාර්තා විය.
ප‍්‍රහාරයෙන් අසල පිහිටි නිවාස 10 කට ද හානි සිදුවී ඇත. ඇෆ්ගන් ආරක්ෂක අංශ පවසන්නේ එය අධිබලැති බෝම්බ ප‍්‍රහාරයක් කියාය.