(අජන්ත කුමාර අගලකඩ)  
මීතොටමුල්ල කසළ කන්ද නායයාමෙන් සිදුවූ ඛේදවාචකයේ වගකීම ප්‍රධාන ආයතන 4 කට පැවරෙන බව ඒ සම්බන්ධයෙන් සොයා බැලිමට පත් කළ ජනාධිපති විමර්ශන කොමිෂන් සභා වාර්තාවේ සඳහන් කර ඇතැයි රජයේ ආරංචි මාර්ගවලින් වාර්තාවේ.  

කොළඹ මහ නගර සභාව, කොළොන්නාව නගර සභාව, බස්නාහිර පළාත් අප ද්‍රව්‍ය කළමනාකරණ අධිකාරිය සහ මධ්‍යම පරිසර අධිකාරිය යන ආයතනවලට මෙම වගකිම පැවරෙන බව වාර්තාවේ සඳහන් වන්නේ යැයි දැන ගන්නට තිබේ.  

කසළ ඉවත් කිරීම සම්බන්ධයෙන් විධිමත් වැඩපිළිවෙළක් අනුගමනය නොකිරීම සහ මීතොටමුල්ල කසළ බැහැර කිරීමේ කටයුතු සඳහා බාහිර ආයතන වෙත ගෙවා ඇති මුදල් අසාමාන්‍ය අයුරින් වර්ධනය වී තිබීම පිළිබඳව කොළඹ මහ නගර සභාවේ නාගරික කොමසාරිස්වරයාටද වාර්තාවෙන් චෝදනා එල්ලවී ඇතැයි වාර්තාවේ.  

මීතොටමුල්ල කසළ කන්ද 2017 වසරේ අප්‍රේල් 14 වැනි දින නායයාම හේතුවෙන් ඇතිවූ ඛේදවාචකයෙන් පුද්ගලයෝ 32 දෙනෙක් මිය ගියහ.   

ඒ සම්බන්ධයෙන් සොයා බැලීමට විශ්‍රාමලත් අභියාචනාධිකරණ විනිසුරු ආචාර්ය චන්ද්‍රදාස නානායක්කාර මහතාගේ සභාපතිත්වයෙන් ජනාධිපති විමර්ශන කොමිෂන් සභාවක් ජනාධිපති මෛත්‍රීපාල සිරිසේන මහතා විසින් පත් කරනු ලැබූ අතර එම කොමිෂන් සභාව සිය වාර්තාව ඉකුත් 6 වැනිදා ජනාධිපතිවරයාට බාර දුන්නේය.