(ප‍්‍රදීප් කුමාර ධර්මරත්න)
 
කෑගල්ලේ පැවති ජන රැළියකට සහභාගී වී ආපසු නිවස බලා යමින් සිටි විශේෂ අවශ්‍යතා සහිත තරුණියක් හෙම්මාතගම ඇල්පිටිය බලවත්ගම ප‍්‍රදේශයෙදී කැළෑවකට රැගෙන ගොස් අපයෝජනය කළ බව කියන තරුණයකු අද(08) අත්අඩංගුවට ගත් බව හෙම්මාතගම පොලිසිය කියයි.
 
මෙසේ අත්අඩංගුවට ගෙන ඇත්තේ හෙම්මාතගම ඇල්පිටිය ප‍්‍රදේශයේ පදිංචි 23 හැවිරිදි තරුණයෙකි.
 
හෙම්මාතගම ඇල්පිටිය ප්‍රදේශයේ පදිංචි 26 හැවිරිදි එම තරුණිය ඊයේ (07) රාත‍්‍රියේ සිය ඥාතිවරියක සමඟ ජන රැළියකට බස් රථයකින් ගොස්, ආපසු පැමිණෙමින් සිටියදී බස් රථයේ සිටි තරුණයකු ඇයව රථයෙන් බස්සවා කැළයකට ගෙන ගොස් දූෂණය කර ඇත. සැකකරුද එම රැළියට සහභාගී වී ඇතැයි අනාවරණය වී තිබේ.
 
සිද්ධිය පිළිබඳ අතවරයට ලක් වූ තරුණියගේ පවුලේ සාමාජිකයන් හෙම්මාතගම පොලිසියට කළ පැමිණිල්ලක් අනුව සැකකරු අත්අඩංගුවට ගෙන තිබේ.
 
එම තරුණිය අද පස්වරුවේ කෑගල්ල මහ රෝහලේ අධිකරණ වෛද්‍ය නිලධාරියා වෙත යොමුකර වාර්තාවක් ලබාගැනීමට පොලිසිය පියවර ගෙන තිබිණි.
 
හෙම්මාතගම පොලිසිය වැඩිදුර පරීක්ෂණ පවත්වයි.