අයෙකුගේ අත්ල පරික්ෂා කිරීමේදී ඔහුගේ හෝ ඇයගේ අත්ල මත සුවිශේෂී සලකුණු දැකිය හැකිය. තම උත්පත්තියේ සිට ගෙන එන ලද පින් පව් සේම මෙම සුවිශේෂී ලකුණුද වෙනස්වීම්වලට භාජන නොවේ. එක් එක් අයට අනන්‍යවූ චරිත ලක්ෂණ මේ තුළින් දැකිය හැකි අතර වාසනාව හා අවාසනාව පිළිබඳවද දැනගත හැකිය.   

   
ත්‍රිශූලය   

ත්‍රිශූලය කියන්නේ උල්තුනකින් හැදුණ ලකුණකටයි. කිසියම් රේඛාවක මුල හෝ අග පිහිටන මෙවැනි ත්‍රිශූල එම රේඛාවෙන් උත්පාදනය වන බල ශක්තිය තුන් ගුණයකින් වැඩිවෙයි. මණ්ඩල මත ස්වාධීනව පිහිටන ත්‍රිශූල ලකුණ ගුරු මණ්ඩලයේ (දබරැගිල්ලේ මුල) දිස්වෙන තැනැත්තා ධනවත්වන බව කියැවේ. දැඩි ආගමික භක්තියක් ඇති අයගේ ත්‍රිශූල සලකුණ ශනි මණ්ඩලයේ විද්‍යාමාන වන අතර රවි මණ්ඩලයේ එය පිහිටීමෙන් ප්‍රසිද්ධ පුද්ගලයකු වන බව ද බුධ මණ්ඩලයේ එම සලකුණ පිහිටිවිට ව්‍යාපාර කටයුතුවල දියුණුවද චන්ද්‍ර මණ්ඩලයේ එය පිහිටීමෙන් ගුප්ත විද්‍යාවේ දක්ෂතාවද සිකුරු මණ්ඩලය මත පිහිටි ත්‍රිශූල ලකුණෙන් රාගාධික පුද්ගලයකු බව ද හඳුන්වා දෙයි.   

කතිර සටහන   

අත්ලේ කතිර සලකුණ ගැඹුරු ලෙස සටහන්වීම අසුභදායකවේ. මෙබඳු සලකුණකින් ශුභඵල ඇතිවන්නේ කලාතුරකිනි. බලාපොරොත්තු කඩවීම්, උවදුරු කරදර තත්ත්වයේ පහත වැටීම් හා මානසික පීඩා ඇතිවීමට කතිර ලකුණ හේතු වෙයි. වෙනත් රේඛා එක්වීමකින් තොරව හුදෙකලා ලෙස කතිර සටහනක් ගුරු මණ්ඩලයේ පිහිටි විට වාසනාවන්ත විවාහයක් සිදුවේ. එය සිදුවන කාලය කතිර සලකුණ පිහිටි ස්ථානය අනුව නිගමනය කළ හැක. ජීවන රේඛාව අසල නම් අවුරුදු විස්සට නුදුරුවද ගුරු මණ්ඩලය මැදවී නම් මැදි වයසේදීද ගුරු මණ්ඩලයේ ඉහළ කොටසේ දබරැගිල්ලට නුදුරුව නම් මැදි වයස ඉක්මවීමක් සමග ද විවාහය සිදුවේ.   

දැල් සටහන   

දිගට හරහට පිහිටියා වූ සිහින් රේඛා සමූහයක් එකිනෙක කැපී යන අයුරින් පිහිටිවිට දැල් ආකාර සලකුණක් වේ. මෙම සලකුණ සාමුද්‍රික ශාස්ත්‍රයේදී ශුභඵල දෙන සලකුණක් නොවේ. ගුරු මණ්ඩලය මත දැල් සටහනක් පිහිටියේ නම් ඉන් ලබන ශුභඵල වැළැකේ. පුද්ගලයා හිතුවක්කාර බවට පෙළඹේ. පහත් පෙළේ ක්‍රියාවන්ට යොමුවීමෙන් සමාජයේ අගෞරවයට ලක්වේ. ශනි මණ්ඩලයේ චෛතසික පීඩා බහුල වෙන අතර කල් ගතවෙන රෝග වැළඳීමට ඉඩ ඇත. බුධ මණ්ඩලය මත නම් වංක ගති ඇති අයකු වෙන අතර අන්‍යයන් රවටා දියුණුවීමට උත්සාහ කරන අයකු වන අතර චන්ද්‍ර මණ්ඩලය මත මෙම සලකුණ පිහිටියේ නම් මානසික පීඩා බහුල වෙන අතර ඇතැම්විට මානසික දුර්වලතා බලපෑමකටද ලක්විය හැක.   

චතුරස්‍ර හෙවත් කොටු සලකුණ   

අනතුරු විපත් ආදියෙන් ආරක්ෂා කිරීමේ ලකුණක් ලෙස කොටු සලකුණ හැඳින්විය හැක. කිසියම් මණ්ඩලයක හෝ රේඛාවකින් අනිෂ්ටඵල ප්‍රකට කෙරෙන ස්ථානයක කොටු සලකුණ පිහිටීමෙන් එමගින් ලැබිය හැකි උවදුරුවලින් ආරක්ෂා වේ. ඇතැම් විට ප්‍රධාන රේඛා විහිද යෑමේදී අතරමගදී රේඛාව කැඩී ටික දුරක් කිසිම සටහනක් නැතිව හිස් වෙන්නට හැර හිස් තැන එසේ තිබියදී නැවත රේඛාව විහිද යයි. එබඳු අවස්ථාවක කැඩුණු රේඛා කැබලි දෙක ස්පර්ශ වනසේ ඒ මැදින් කොටු සලකුණක් පිහිටීමෙන් ප්‍රධාන රේඛාව කැඩීමෙන් ඇතිවන අනිෂ්ඨ විපාක මග හැරේ. ජීවන ​ෙර්ඛාවේ එසේ වූ විට මරණය සහිත රෝගවලින්ද, ශීර්ෂ රේඛාවෙන් නම් මානසික ආබාධවලින්ද, රවි රේඛාවේ නම් කීර්ති හා ධන හානි වලින්ද දෛව රේඛාවේ නම් ආපදා ධන හානි තත්ත්වයෙන් පහළ වැටීම් ආදියෙන්ද අත් හිමියාට පලාපල සිදුවේ.   

මත්ස්‍ය ලකුණ   

මත්ස්‍ය සලකුණ (මාළුවා) මණ්ඩල මත වගේම රේඛා ආශ්‍රිතවත් පිහිටිය හැක. රේඛා ඛණ්ඩි ගැසීමෙන් බොහෝවිට මෙම ලකුණ පිහිටීමට ඉඩ ඇත. මත්ස්‍ය සලකුණ ඉතාමත් සුභඵල ගෙනදෙන ලකුණක් වේ. අනේක විධ භව භෝග සම්පත් ලැබීමට හේතු වන්නකි. කාන්තාවකගේ අතක මාළුවෙකුගේ ලකුණ පිහිටා තිබේ නම් ඇයට ලක්ෂ්මි යෝගය උදාවන බව ශාස්ත්‍රීය නියමයයි. වාසනාවන්ත පුරුෂයෙකුට බිරිඳ වන ඇය සුපුන්වත් දූ පුතුන් ලබන ජාතියේ ශ්‍රේෂ්ඨ මාතාවක වේ.   

කවයක සලකුණ   

කවයක සලකුණ බොහෝවිට සුභදායක නොවේ. සුභදායක වන්නේ රවි මණ්ඩලයට පමණි. එමගින් ධනය, බලය හා කීර්තිය ළඟා කරයි. වෙනත් මණ්ඩලයක පිහිටියහොත් අනිෂ්ට විපාක ඇතිවිය හැක. මහපට ඇඟිල්ලේ හෝ බුධ මණ්ඩලයේ හෝ බුධ රේඛාවේ පිහිටිවිට වසවිෂ වලින් මරණය පවා සිදුවිය හැකිය. චන්ද්‍ර මණ්ඩලයේ කවයක සලකුණ පිහිටීම දියෙන් ඇතිවන විපත් පෙන්නුම් කරයි. වෙනත් ප්‍රධාන රේඛාවකට සම්බන්ධ වී නම් දුක් කරදර වලින් අඩුවක් නොවේ.   

දූපත් සලකුණ   

දූපත් සලකුණ අත්ලේ කුමන ස්ථානයක පිහිටියත් අසුභ ඵල ගෙනදේ. පුංචි දූපත් ලකුණු වලින් තදබල විපාකයක් සිදු නොවුණත් ලොකු දූපත් ලකුණුවලින් මාරක අපල පවා සිදුවිය හැකිය. ගුරු මණ්ඩලය මත පිහිටන දූපත් සලකුණෙන් ආත්මගෞරවයට හානි සිදුවන බවද ශනි මණ්ඩලයේ එම ලකුණ පිහිටීමෙන් අන් අයට උදව් කිරීමට යෑමෙන් තමනට වන බාධක කරදර ද බුධ මණ්ඩලයේ නම් හවුල් ව්‍යාපාරවලින් වන අලාභද සිකුරු මණ්ඩලයේ නම් රාගික හැඟීම්වලට වහල්වීමෙන් ඇතිවන ව්‍යසන ද පෙන්නුම් කරයි.   

ධාන්‍ය ලක්ෂණ   

මෙම ලකුණු බොහෝ විට අතේ ඇඟිලි පුරුක් අතර තිබිය හැක. ධාන්‍ය ඇටයක හෙවත් වී ඇටයක හැඩයෙන් යුතු ලක්ෂණය මේ නමින් හඳුන්වයි. මෙම සලකුණ භාග්‍යමත් ලක්ෂණයක් ලෙස සාමුද්‍රික ශාස්ත්‍රයේ සඳහන් වෙයි. අත්ලේ කුමන ස්ථානයක පිහිටියත් ධාන්‍ය ලක්ෂණය සුභඵල ගෙනදෙයි. යස ඉසුරු ලබාදෙන භාග්‍යමත් ලකුණක් වන මෙය රේඛාවක් මැද පිහිටීම ශුභදායක නොවන්නේ එම සටහන එවිට දූපතකට සමාන වන බැවිනි.   

හිඹුටානේ පියතිලකද අල්විස්   
158 හිඹුටාන මුල්ලේරියාව නව නගරය   
දුර: 0112419574, 0716212020