(ක.ග.කරුණාරත්න)

හබරණ පොලිස් වසමේ ස්ථාන තුනකදී අද (23) සිදුවූ රිය අනතුරු 3 කින් කාන්තාවන් 7 ක් සහ පිරිමි පුද්ගලයින් 16 දෙනෙකු තුවාල ලබා ඇතැයි හබරණ පොලීසිය කියයි.

හබරණ - ත‍්‍රිකුණාමලය ප‍්‍රධාන මාර්ගයේ හිරිගල්පොත්ත ප‍්‍රදේශයේදී වන්දනාකරුවන් පිරිසක් ගමන් ගත් පෞද්ගලික බස් රථයක් මාර්ගයෙන් ඉවතට පැන අනතුරට ලක්වීම නිසා කාන්තාවන් 7 දෙනෙකු සහ පිරිමි පුද්ගලයින් 11 දෙනෙකු තුවාල ලබා තිබේ.ඔවුන්ප‍්‍ රතිකාර සඳහා කන්තලේ රෝහලට ඇතුළත් කර ඇත.

පොළොන්නරුව හබරණ ප‍්‍රධාන මාර්ගයේ හබරණ දේවාලේ කඬේට ආසන්නයේදී ලොරි රථ දෙකක් සහ මෝටර් රථයක් අනතුරට ලක්වීමෙන් මෝටර් රථයේ ගමන් ගත් 04 දෙනෙක් තුවාල ලබා ඇතැයි හබරණ පොලීසිය කියයි.

තුවාලකරුවන් ප‍්‍රතිකාර සඳහා හබරණ රෝහලට ඇතුළත් කර ඇත. ඔවුහු දඹුල්ල ප‍්‍රදේශයේ පදිංචිකරුවන් බව අනාවරණයවී තිබේ.

අනතුර සිදුවන අවස්ථාවේ එම ප‍්‍රදේශයට අධික වර්ෂාවක් පැවැතී ඇති අතර මුලින්ම ධාවනය වෙමින් තිබූ ලොරියක් ලිස්සා ගොස් මාර්ගයෙන් ඉවතට පැන තිබේ.

මද වේලාවකින් ඒ ස්ථානය පසුකර යමින් තිබූ තවත් ලොරියක් සහ මෝටර් රථයක් එකිනෙක ගැටී කලින් පෙරලුණු ලොරිය මතට වැටී ඇතැයි පොලීසිය සඳහන් කරයි.

මේ අතර හබරණ පොලොන්නරුව ප‍්‍රධාන මාර්ගයේ මොරගස්වැව ප‍්‍රදේශයේදී ලොරියක් සහ බස් රථයක් අනතුරට ලක්වීමෙන් බස් රථයේ ගමන් ගත් අයෙකු තුවාල ලබා තිබේ.

තුවාලකරු ප‍්‍රතිකාර සඳහා හබරණ රෝහලට ඇතුළත් කර ඇත.