(කාංචන කුමාර ආරියදාස)
 
සීගිරිය අභය භූමියේ සීගිරිය රාම කැලේ නමින් හඳුන්වන ප්‍රදේශයේ,  ඓතිහාසික නටබුන් නිධන් හොරුන්ගේ ග්‍රහණයට ලක්ව විනාශවෙමින් පවතින බව වනජීවි නිලධාරීහු පවසති. 
 
නිධන් හොරුන් මෙම ස්ථානයේ  කොරවක්ගල්, සඳකඩ පහණ, චෛත්‍යය, පැරණි ගඩොල්, ගල් කණු විශාල වශයෙන් විනාශ කර, චෛත්‍යය ගර්භ හාරා, පුරාවස්තු සංහාරයක් කර ඇත.
 
සීගිරිය වනජීවී නිලධාරීන් රාජකාරියකට  අභය භූමියට යන අවස්ථාවක පුද්ගල කණ්ඩායමක් මෙම ස්ථානයේ කැණීම් කරමින් සිට පැන ගොස් තිබිණි. ඔවුන් ගෙන ආ කැණීම් උපකරණ සහ ජංගම දුරකථනයක් ද එම ස්ථානයේ දමා ගොස් තිබියදී වනජීවී නිලධාරීන්ගේ භාරයට ගෙන තිබිණි. 
 
සීගිරිය පුරාවිද්‍යා කාර්යාලයට, පොලිසියට සහ වනජීවී කාර්යාලය කිලෝමීටර් එකහමාරක පමණ දුරකින් පිහිටි මෙම භූමියේ ඇති නටඹුන් අනුව ඒවා රජ මාළිගයකට හෝ බෞද්ධ මන්දිරයකට අයත් ඒවා විය යුතු බව ඔවුහු පවසති.
 
මේ සම්බන්ධයෙන් විමසීමේදී සීගිරිය පුරාවිද්‍යා කාර්යාලයට ගියද එහි නිලධාරීන් අද දින නිවාඩු බව පැවසූ එහි සේවකයෙක් එහි නිලධාරීන් 48දෙනෙකු සේවයේ නිරත වන බව පැවසීය.
 
ජනතා මුදල් ගෙවා පුරාවිද්‍යා ස්ථාන ආරක්ෂා කර ගැනීම සඳහා පසුගිය කාලයේ විශාල සේවකයන් පිරිසක් හිටපු අමාත්‍ය අකිල විරාජ් කාරියවසම් මහතා විසින් සීගිරියට බඳවා ගෙන තිබූ නමුත්, පුරාවිද්‍යා භූමි සියල්ල නිධන් හොරුන්ගේ ග්‍රහණයට නතුවීම පුදුමයට කරුණක් බව ප්‍රදේශවාසීහු කියති.