(තිලකරත්න දිසානායක.)

 දෙදිනක් පුරා ඇද හැලෙන අධික වර්ෂාව හේතුවෙන් ගම්පහ දිස්ත්‍රික්කයේ ප්‍රාදේශීය ලේකම් කොට්ඨාස 9 ක පවුල් 1170 කට අයත් සාමාජිකයින් 4824 දෙනෙකු පීඩාවට පත්ව ඇතැයි දිස්ත්‍රික් ආපදා මෙහෙයුම් කාර්යාලය සදහන් කළේය.

  ගම්පහ , අත්තනගල්ල ,  වත්තල ,  දිවුලපිටිය , දොම්පෙ ,  මිනුවන්ගොඩ , බියගම,  මීරිගම සහ කැලණිය යන ප්‍රාදේශීය ලේකම් කොට්ඨාසයන්හි පවුල් මෙලෙස පීඩාවට පත්ව ඇති අතර නිවාස 23 කට අර්ධ හානි සිදුව තිබේ.

  කැලණි ගගෙහි සහ අත්තනගලු ඔයෙහි ජල මට්ටම අද (21) වන විට ගම්පහ දිස්ත්‍රික්කයට ගංවතුරක් ඇතිවිය හැකි මට්ටමකට පත්ව තිබෙන බව දිස්ත්‍රික් ආපදා කළමනාකරණ සහකාර අධ්‍යක්ෂ අජිත් නිශාන්ත මහතා පැවසීය.

  පවතින අයහපත් තත්ත්වය මත කැලණි ගග අවට සහ පහත් බිම් ආශ්‍රිතව වෙසෙන ජනතාව ඉවත් කිරීම පිනිස දැනුවත් කිරීමට පියවර ගනිමින් සිටින බවද සහකාර අධ්‍යක්ෂ වරයා සදහන් කළේය.

   මේ අතර අද දහවල් 12 වනවිට අත්තනගලු ඔයෙහි දුනමලේ ජල මාපකයෙහි ජල මට්ටම     මීටර් 5 දශම 38 ක් දක්වා ඉහළ ගොස් තිබු බවත් ගම්පහ දිස්ත්‍රික්කයට මහ ගංවතුර තත්ත්වයක් ඇතිවීම මෙම ජල මට්ටම මීටර් 5 දශම 5 පත්වීමේදී සිදුවිය හැකි බවත් ජල මට්ටම පැහැදිලි කරමින් ගම්පහ දිස්ත්‍රික් වාරිමාර්ග ඉංජිනේරු චින්තක සුරවීර මහතා කීය. 

  අත්තනගලු ඔය ආශ්‍රිත පහත්බිම් සහ මාර්ගද ඌරුවල් ඔය ආශ්‍රිතව ගම්පහ අවට මාර්ග කිහිපයක්ද ජලයෙන් යටව පැවතීම මත වාහන ගමනා ගමනයට බාධා සිදුව තිබිණි.

  පීඩාවපත් ජනතාවට කඩිනම්න් පහසුකම් සැලසීම පිණිස අවශ්‍ය පියවර ගන්නා ලෙස ගම්පහ දිසාපති සුනිල් ජයලත් මහතා විසින් දිස්ත්‍රික්කයේ ප්‍රාදේශීය ලේකම්වරුන්ට සහ ආපදා කළමනාකරණ නිලධාරීන් වෙත උපදෙස් ලබාදී තිබිණි.