( ඩී.කේ.රත්න )
හපුතලේ රෝහලේ වෛද්‍යවරයෙකුට පහරදීම සම්බන්ධයෙන් අත්අඩංගුවට ගනු ලැබූ පෞද්ගලික බස් රථයක සේවකයින් දෙදෙනා  බණ්ඩාරවෙල මහේස්ත‍්‍රාත් අධිකරණයට ඉදිරිපත් කිරීමෙන් පසු පෙබරවාරි 6 වන දින දක්වා රක්ෂිත බන්ධනාගාරගත කරන්නැයි  බණ්ඩාරවෙල මහේස්ත‍්‍රාත් කීර්ති කුඹුරේහේන මහතා අද (29) නියෝග කළේය.
 
 පෞද්ගලික බස් රථයේ රියදුරු ලෙස සේවයේ නියුතුව සිටි ඉදල්ගස්හින්න බෝවවත්ත අංක 20 ලිපිනයේ පදිංචි අයියසාමි සුබ‍්‍රමනියම් සහ එම බස් රථයේ කොන්දොස්තර වශයෙන් සේවයේ නියුතුව සිටි ඉදල්ගස්හින්න බෝවවත්ත අංක 06 ලිපිනයේ පදිංචි ක‍්‍රිෂාන් මූර්ති සුරේශ් කුමාර් නැමති අය මෙසේ රක්ෂිත බන්ධනාගාර ගත කළේය.
 
 හපුතලේ රෝහලට අනුයුක්තව සේවයේ යෙදී සිටි කසුන් උදාරංග නැමති වෛද්‍යවරයෙකු සිය මෝටර් රථයෙන් හපුතලේ බෝවවත්ත මාර්ගයේ යමින් සිටියදී පෞද්ගලික බස් රථයට ඉඩදීම සම්බන්ධයෙන් ඇතිවූ කතා බහකදී තංගමලේ රෝහල අසලදී මෙම වෛද්‍යවරයාට පහරදී ඇතයි හපුතලේ පොලීසිය පවසයි.
 
පහරකෑමට ලක්වූ වෛද්‍යවරයා හපුතලේ දිසා රෝහලට ඇතුළත් කර තිබේ.