2023 පෙබරවාරි මස 04 වන සෙනසුරාදා
(බිමල් ශ්‍යාමන් ජයසිංහ)
වාද්දුව පොතුපිටිය කටුගන්ගොඩ නිවසකට වෙඩි තැබීමේ සිද්ධිය සම්බන්ධයෙන් පොලිසිය සොයමින් සිටි සැකකරු අද(26) පොතුපිටිය විහාරස්ථානයක් අසළදී අත්අඩංගුවට ගත් බව පානදුර කොට්ඨාස නීතිය බල ගැන්වීමේ ඒකකය කියයි.
වෙඩිතැබීමට යොදාගත් ටී 56 ගිනි අවිය හා ජීව උණ්ඩ 11ක් ද නිවස ආසන්නයේ ලඳු කැලෑවක් සඟවා තිබියදී සොයාගත් බව පොලිසිය පවසයි.
සොයාගත් එම ගිනි අවිය යුද හමුදාව භාවිත කළ එකක් බව මූලික පරීක්ෂණවලදී තහවුරු වූ බව පොලිසිය කියයි.
ඉකුත් 02 වැනි දින එම නිවසට එල්ල වූ වෙඩි ප්‍රහාරයකින් නිවසට හානි වී තිබිණි.
එම සිද්ධියෙන් දින 4කට පසු හෙරොයින් සමඟ අත්අඩංගුවට ගත් සැකකරුවකුගෙන් ප්‍රශ්න කිරීමේදී මෙම ගිනි අවිය සංවිධානාත්මක අපරාධකරුවකු වන දැනට බන්ධනාගාර ගතව සිටින කොණ්ඩ චමින්ද නමැත්තාට අයත් එකක් බවද, ඒ මොහොත වනවිට එය පොතුපිටිය ප්‍රදේශයේ පුද්ගලයකු සතුව ඇතැයිද අනාවරණය වූ බව පොලිසිය කියයි.
පානදුර කොට්ඨාස නීතිය බල ගැන්වීමේ ඒකකය පරීක්ෂණ පවත්වයි.
