(කේ. බුද්ධික කුමාරසිරි සහ එච්. එස්. ඒ. නන්දන )
 
හයිලෙවල් මාර්ගයේ පන්නිපිටිය මංසන්ධිය ආසන්නයේදී සහ හංවැල්ල පහත්ගම මංසන්ධිය ආසන්යේදී අද (08) සිදු වූ අනතුරු දෙකකින් දෙදෙනෙකු මිය ගොස් සිව්දෙනෙකු තුවාල ලබා රෝහල් ගත කර ඇතැයි හෝමාගම රෝහල් පොලිසිය පවසයි.
 

එයින් එක් අනතුරක් අලුයම පන්නිපිටිය මංසන්ධිය ආසන්නයේ මාර්ග අයිනේ නවතා තිබූ විශාල බහාලුම් රථයක පිටුපස ත්‍රී රෝද රථයක් ගැටීමෙන් සිදු ව ඇති අතර එම අනතුරින් තී‍්‍ර රෝද රථයෙහි ගමන් ගත් එක් අයෙකු මියගොස් සිව්දෙනෙකු තුවාල ලබා හෝමාගම මූලික රෝහලට ඇතුලත් කර ඇතැයි හෝමාගම රෝහල් පොලිසිය පවසයි

අනතුරට ලක් වූ ත්‍රීරෝද රථයෙහි ගමන් ගත් පිරිස කිතුල්ගල ප‍්‍රදේශයේ සිට මහරගම අපේක්ෂා රෝහලෙහි සායනයක් සදහා යමින් සිටියදී මෙලෙස අනතුරට ලක්ව ඇති බවත් අනතුරින් තී‍්‍ර රෝද රථයෙහි රියදුරු මිය ගොස් එහි පිටුපස ගමන් ගත් කාන්තාවන් තිදෙනෙකු සුළු තුවාල ලබා ඇති බවත්, වයස අවුරුදු තුනහමාරක දරුවෙකු බරපතල තත්වයෙන් හෝමාගම මූලික රෝහලට ඇතුළත් කිරීමෙන් පසු කොළඹ ජාතික රෝහලට මාරු කර යවා ඇති බවද පොලිසිය පවසයි.
 
මෙලෙස අනතුරින් මියගොස් ඇත්තේ කිතුල්ගල පල්ලේබාගේ ප‍්‍රදේහයේ පදිංචිකරුවෙකු වන පල්ලෙබාගේ වෙදරාළලාගේ විමුක්ති අකලංක අබේසිංහ නමැති 22 හැවිරිදි තරුණයෙකි
 
අනෙක් අනතුර හයිලෙවල් මාර්ගයේ හංවැල්ල පහත්ගම මංසන්ධිය ආසන්නයේදී යතුරුපැදියක් ටිපර් රථයක ගැටීමෙන් සිදු ව ඇති අතර එම අනතුරින් යතුරුපැදියෙහි ගමන් ගත් කාන්තාවක් බරපතල තුවාල ලබා හෝමාගම මූලික රෝහලට ඇතුළත් කිරීමෙන් පසු මිය ගොස් ඇති බවද පොලිසිය පවසයි.

 මිය ගිය කාන්තාව ලොතරැයි අලෙවි කුටි සදහා ලොතරැයිපත් බෙදා හැරීමේ රැකියාවක නිරතව සිට ඇති අතර ඇය  (08) දින උදෑසන පාදුක්ක ප‍්‍රදේශයේ ලොතරැයි අලෙවි නියෝජිකයෙකුගෙන් ලොතරැයිපත් ලබා ගෙන හංවැල්ල අවට ප‍්‍රදේශවලට බෙදා හැරීම සදහා යන අවස්ථාවේදී අවිස්සාවේල්ල දෙස සිට හෝමාගම දෙසට පැමිනි ටිපර් රථයක ගැටීමෙන් මෙලෙස මරණයට පත්ව ඇති බවද පොලිසිය පවසයි.
 
එම අනතුරින් මිය ගොස් ඇත්තේ හංවැල්ල හරස් පාර ප‍්‍රදේහයේ පදිංචිකාරියක වන රන්හළු පේඩිගේ රොමේෂා අනුරුද්ධිකා නමැති 45 හැවිරිදි  කාන්තාවකි.
 
අනතුරට සම්බන්ධ ටිපර් රථයේ රියදුරු හංවැල්ල පොලිසිය මගින් සැකපිට අත්අඩංගුවට ඇති අතර සැකකරු අවිස්සාවේල්ල මහේස්ත‍්‍රාත් අධිකරණයට ඉදිරිපත් කිරීමට නියමිතය.