(කේ.බුද්ධික කුමාරසිරි)
 
හොරණ  -  මහරගම මාර්ගයේ මොරගහහේන බෙරුකැටිය ප‍්‍රදේශයේදී යතුරුපැදියක් සහ මෝටර් රථයක් ගැටීමෙන් ඊයේ (28) රාති‍්‍රයේ සිදු වූ අනතුරකින් යතුරුපැදිකරු මිය ගොස් තුවාල ලැබූ මෝටර් රථයේ රියදුරු හෝමාගම මූලික රෝහලට ඇතුළත් කර ඇතැයි මීගොඩ පොලිසිය පවසයි.
 
මිය ගොස් ඇත්තේ රියදුරෙකු ලෙස රැකියාවේ නිරතව සිටි කුඩා උඩුව උතුරු උඩුව සේදගොවිපලවත්ත ප‍්‍රදේශයේ පදිංචිකරුවෙකු වන මද්දුමගේ දොන් ගයාන් මංජුල රණසිංහ නමැති 35 හැවිරිදි එක්දරු පියෙකි.
 
බරපතල තුවා ලබා මහා මාර්ගය මත පැයකට ආසන්න කාලයක් යතුරුපැදිකරු වැටී සිටියද ඔහුව රෝහල වෙත රැගෙන යාමට කිසිවෙකු කටයුතු කර නොමැති අතර, ලද තොරතුරකට අනුව මීගොඩ පොලිසියේ ජංගම සංචාරයේ යෙදී සිටි නිලධාරීන් පැමිණ තුවාලකරු සුවසැරිය ගිලන් රථයකින් හෝමාගම මූලික රෝහලට ඇතුළත් කිරීමට කටයුතු කර තිබූ බවද පොලිසිය පවසයි.
 
මොරගහහේන දෙස සිට තලගල දෙසට ධාවනයෙ වෙමින් තිබූ මෝටර් රථය එක්වරම ප‍්‍රතිවිරුද්ධ දෙසට ධාවනය වී තලගල දෙස සිට මොරගහහේන දෙසට පැමිණෙමින් සිටි යතුරුපැදියෙහි ගැටී, පාලම් බෝක්කුවක ආරක්ෂිත කනුවල ගැටී ඇතැයි සිදු කල මූලික පරීක්ෂණයේදි අනාවරණය වූ බවද පොලිසිය පවසයි.
 
මෝටර් රථය පැද වූ රියදුරු සැකපිට මීගොඩ පොලිසිය මගින් අත්අඩංගුවට ගෙන ඇති අතර සැකකරු බීමත්ව සිටි බවට වෛද්‍යවරු කළ පරීක්ෂණයේදී අනාවරණය වී ඇති බවද පොලිසිය පවසයි
 
අත් අඩංගුවට ගත් සැකකරු හෝමාගම මහේස්ත‍්‍රාත් අධිකරණය වෙත ඉදිරිපත් කිරීමට නියමිතය.