(ඩී.ජී.සුගතපාල සහ ජී.ඩබ්.කේ.ප්‍රේමතිලක ද සිල්වා)
 
ගාල්ල අකුරැස්ස ප්‍රධාන මාර්ගයේ අඟුලුගහ ප්‍රදේශයේදි ත්‍රිරෝද රථයක් සහ ලොරියක් ගැටීමෙන් ඊයේ(02) රාත්‍රියේ වූ අනතුරකින් ත්‍රිරෝද රථයේ ගමන්ගත් කාන්තාවන් දෙදෙනෙකු මියගොස් තවත් පස්දෙනෙකු බරපතල තුවාල ලබා කරාපිටිය රෝහලට ඇතුළත් කළ බව ඉමදුව පොලිසිය පවසයි.
 
මියගොස් ඇත්තේ විරකැටිය ප්‍රදේශයේ පදිංචි 35 හැවිරිදි සහ 65 හැවිරිදි කාන්තාවෝ දෙදෙනෙකි. ළමයින් දෙදෙනෙකු ඇතුලු තවත් පස්දෙනෙකු තුවාල ලබා ඇත.
 
අනතුරට ලක්ව ඇත්තේ විදුලිබල මණ්ඩලයට අයත් ලොරි රථයකි.
 
අනතුර සිදුවන අවස්ථාවේ ත්‍රිරෝද රථයේ ළමයින් ඇතුලු  හත්දෙනෙකු ගමන්කර ඇතැයි පොලිසිය පවසයි.
 
ගාල්ලේ සිට අකුරැස්ස දෙසට ගමන් කරමින් තිබූ ත්‍රි රෝද රථය, ඊයේ රාත්‍රියේ අකුරැස්සේ සිට ගාල්ල දෙසට ධාවනය වෙමින් තිබූ ලොරියේ ගැටී අනතුර සිදුව තිබේ.
 
මළ සිරුරු කරාපිටිය රෝහලේ මෘත ශරිරාගාරයේ තැන්පත් කර ඇති අතර ඉමදුව පොලිසිය විසින් වැඩිදුර පරීක්ෂණ පවත්වයි.