( රොමේෂ් මධුෂංඛ )
 
මෙවර මහකන්නයේ වන්නි දිස්ත්‍රීක්කයේ වී අස්වැන්නෙන් වී මෙට්‍රික්ටොන් ලක්ෂයකට ආසන්න ප්‍රමාණයක් බලාපොරොත්තුවන අතර ගොවීන්ගේ සියලු වී අස්වැන්න රජයෙන් මිලදී ගැනීමට සියල්ල සූදානම් කර ඇති බවට වව්නියාව දිසාපති සමන් බන්ධුලසේන මහතා කීවේය.
 

දිසාපතිවරයා මේ බව පවසා සිටියේ අද (11) වන්නි දිස්ත්‍රීක්කයේ ගොවීන්ගේ වී අස්වැන්න රජයේ වී මිලදී ගැනීමේ මධ්‍යස්ථාන වලදී මිලදී ගැනීම් නීරීක්ෂණය කිරීමට ගිය අවස්ථාවේදීය.
 
වන්නි දිස්ත්‍රීක්කයේ ගොවීන් මෙවර අක්කර 45,000 කට අධික ප්‍රමාණයක් ගොවිතැන් කර  ඇති අතර මෙවර මහකන්නයේ වී අස්වැන්න වෙනුවෙන් ප්‍රමාණවත් ජලය හා පොහොර ලැබීම හේතුවෙන් සාර්ථක වී අස්වැන්නක ගොවීන්ට ලැබී ඇත.

සම්බා , නාඩු සහ කීරි සම්බා වෙනුවෙන් රුපියල් 50 ක් වූ සහතික මිලකට වී තොග ලබා දීමට ගොවීන්ට අවස්ථාව ලබා දී ඇති අතරම වී මිලදී ගැනීමේදී රජයේ වී මිලදී ගැනීමේ මධ්‍යස්ථාන වලින් මෙතෙක් අනුමත කර තිබූ වී වල තෙතමන සීමාව 14% සිට 21 % දක්වා වැඩි කිරීමටද ජනාධිපති තුමන්ගේ උපදෙස් පරිදි පියවර ගෙන ඇති බවට වව්නියාව දිසාපතිවරයා කියා සිටියේය.
 
 එමෙන්ම වව්නියාව නගරය, වේප්පන් කුලම්, වව්නියාව පාක්රෝඩ්, මාමඩුව හා නෙඩුන්කේනි යන රජයේ වී මිලදී ගැනීමේ මධ්‍යස්ථාන හරහා වී මිලදී ගැනීමේ කටයුතු සිදු කෙරෙන අතරම වන්නි ගොවීන්ගෙන් වී මිලදී ගැනීම වෙනුවෙන් මූලික අදියරට රජය විසින් රුපියල් කෝටි 20 ක මුදලක් වෙන් කර ඇති බවට වී ලබා දුන් ගොවීන්ට ඉතා ඉක්මනින් මුදල් ලබාදීමේ ක්‍රියා පිළිවෙතක්ද අනුගමනය කොට ඇති බවට වව්නියවා දිසාපති සමන් බන්ධුලසේන මහතා වැඩි දුරටත්පැවසීය.