(හිරාන් ප්‍රියංකර ජයසිංහ)

මුන්දලම මදුරන්කුලිය නගරයේ අද (30) යුද හමුදාව සහ පොලිසිය එක්ව කළ මෙහෙයුමේදී විවිධ චෝදනා සම්බන්ධ සැකකරුවන් හයදෙනෙකු අත්අඩංගුවට ගත් බව මූන්දලම පොලිසිය පවසයි. 

 
අත්අඩංගුවට ගත් සැකකරුවන් අතර කඩුවක් සඟවා ගෙන සිටි පුද්ගලයෙක්, ව්‍යාජ අංක තහඩු සැකසීමේ ස්ථානයක් පවත්වාගෙන ගිය සැකකරුවන් සහ ෂැංග්‍රිලා හෝටලය ඉදිකරන සමයේ එහි සේවය කළ මුස්ලිම් ජාතිකයකුට අයත් හැඳුනුම්පත මදුරන්කුලිය මුස්ලිම් දේවස්ථානයේ ඇඳක් යට සඟවා තිබීම සම්බන්ධව එහි මව්ලවිවරයා අත්අඩංගුවට ගෙන තිබුණි. 
 
ව්‍යාජ අංක තහඩු සැකසූ සැකකරුවන් මදුරන්කුලිය නගරයේ ස්ටිකර් සැකසීමේ ස්ථානයක් පවත්වාගෙන යන මුවාවෙන් ව්‍යාජ අංක තහඩු සකසා ඇති බව කියයි. එම ව්‍යාජ අංක තහඩු මොටර් රථ ප්‍රවාහන දෙපාර්තුමේන්තුවේ අංක තහඩුවලට සමාන ආකාරයෙන් සකසා තිබූ බවත් පොලිසිය පවසයි.

අත්අඩංගුවට ගත් සැකකරුවන් මුන්දලම පොලිසිය භාරයට ගෙන තිබූ අතර මොවුන්  ප්‍රශ්න කිරීමෙන් අනතුරුව පුත්තලම අධිකරණයට ඉදිරිපත් කිරීමට නියමිතය.