(අනීෂා මානගේ)

බලපත්‍ර නොමැතිව ලොරි රථයකින් හිංසාකාරි ලෙස මී ගවයින් සහ එළ ගවයින් ප්‍රවාහනය කිරීමට සූදානම් වූ බව කියන දෙදෙනකු අද (21) අලුයම අත්අඩංගුවට ගත් බව පොලිස් විශේෂ කාර්ය බළකායේ තංගල්ල කඳවුරේ නිලධාරීහු පවසති.

මෙලෙස අත්අඩංගුවට පත්ව ඇත්තේ වීරකැටිය යක්ගස්මුල්ල සහ වලස්මුල්ල ඉත්තදෙමලිය ප්‍රදේශවල පදිංචි 36 සහ 39 හැවිරිදි දෙදෙනකු බව නිලධාරීහු කියති.

වීරකැටිය යක්ගස්මුල්ල ප්‍රදේශයේ දී අද (21) අලුයම 2.45ට පමණ සැකකරුවන් සහ ලොරි රථය අත්අඩංගුවට ගෙන ඇති අතර ලොරි රථය තුළ පටවා සිටි බව කියන මී ගවයකු, මී දෙනුන් හතක්, එළගවයකු සහ එළදෙනුන් දෙදෙනකු ද නිලධාරීන්ගේ බාරයට ගෙන ඇත.

මෙම ගවයින් වීරකැටියේ සිට ගාල්ලට ප්‍රවාහනය කිරීමට සූදානමින් තිබූ බව නිලධාරීහු කියති.

ගවයින් සොරකම් කර බලපත්‍ර නොමැතිව හිංසාකාරී ලෙස මෙලෙස ප්‍රවාහනය කිරීම දීර්ඝ කාලයක සිට සිදුකර ඇති බවට තොරතුරු අනාවරණය වූ බවද නිලධාරීහු පවසති.