2023 පෙබරවාරි මස 05 වන ඉරිදා
(ක.ග.කරුණාරත්න)
තම ගම්මානවලට දිගින් දිගටම සිදුවන වන අලින්ගේ හිරිහැර වළක්වාලීමට නොපමාව පියවර ගන්නා ලෙස බල කරමින් බකමූණ,බුදුරුවයාය සහ ඒ අවට ගම්මාන රැසක ජනතාව අද (03) පෙරවරුවේ බකමූණ, බුදුරුවයාය ප‍්‍රදේශයේදී උද්ඝෝෂණයක නිරතවූහ.
විරෝධතාකරුවන් බකමූණ හෙට්ටිපොළ ප‍්‍රධාන මාර්ගයට පැමිණ ඒ මාර්ගයද අවහිර වනසේ උද්ඝෝෂණයේ නිරතව සිටීම නිසා එහි රථවාහන ගමනා ගමනයටද බාධා එල්ලවී තිබෙන බව පොලීසිය සඳහන් කළේය.
මේ වනවිට වන අලි පහරදීම් හේතුවෙන් මිනිස් ජීවිත රැසක් විනාශවී ඇතැයිද දිනපතාම පාහේ අලි ගම්වැදී ගෙවල් දොරවල් කඩා දමා ගෙවතුවල වගාවන් විනාශ කරමින් සිටින බව විරෝධතාවට එක්ව සිටින ගම්වාසීහු ප‍්‍රකාශ කළහ.
දැනට දින කීපයෙකට පෙර මිනිස් ජිවිතයක් බිලිගත් අලියා එතැන් පටන් ගම්මානය තුළ රැඳීසිටිමින් තවත් කිහිප දෙනෙකුටම පහරදී ඇතැයිද නිවාස ගණනාවක් කඩා බිඳ දැමූ බවද කීහ.
අද(03) අලුයමද ඒ අලියා කාන්තාවකට පහරදී තුවාල සිදුකර නිවෙසක්ද කඩා දමා තිබෙන බව පැවැසූ උද්ඝෝෂණයේ නිරත ජනයා අලි හිරිහැර ඉවසා ගැනීමට බැරිම තැන මෙසේ මහඟට බැස විරෝධය දැක්විමට තීරණය කල බවද කියා සිටියහ.
