(නිමල් ජයරත්න)
 
කල් ඉකුත් වූ සහල් තොග ගබඩා කිරීම ඇතුළු චෝදනා තුනක් සම්බන්ධයෙන් පොළොන්නරුව වැලිකන්ද සිංහපුර ප්‍රදේශයේ මහා පරිමාණ සහල් ගබඩාවකට අද(27) මුද්‍රා තැබීමට පියවර ගත් බව පොළොන්නරුව පාරිභෝගික සේවා අධිකාරියේ ආයතන ප්‍රධානි එච්. ජී. සී චන්ද්‍රකුමාර මහතා පැවසීය.
 
කල් ඉකුත් වු සහල් සහිත අසුරන, හොඳ සහල් සමග මිශ්‍රව ගබඩා කර තැබීම, කල් ඉකුත් වූ සහල් ඇසුරුම්වල මුද්‍රණ දින වෙනස් කිරීම, උපරිම සිල්ලර මිලට වඩා වැඩි මිලක් සඳහන් කර තැබීම යන චෝදනා යටතේ සහල් මෝල් හිමිකරුට විරුද්ධව හෙට(28) පොළොන්නරුව මහේස්ත්‍රාත් අධිකරණයේ නඩු පැවරීමට තීරණය කර ඇති බව චන්ද්‍රකුමාර මහතා සඳහන් කළේය.
 
එම සහල් මෝල ඊයේ(26) රාත්‍රියේ වටලන අවස්ථාවේදී කල් ඉකුත් වූ සහල් කිලෝ 88,000ක් ඇතුළු සහල් කිලෝ දෙලක්ෂ හතලිස් පන්දහසක් පමණ ගබඩා කර තිබූ බවත්, එම සහල් සියල්ල ගබඩාවෙම මුද්‍රා තබා පොලිස් භාරයේ රඳවා තිබෙන බවද චන්ද්‍රකුමාර මහතා පැවසීය.
 
කල් ඉකුත් වු සහල් තොගවලින් සාම්පල් කිහිපයක් මහජන සෞඛ්‍ය පරීක්ෂකවරුන් හරහා රජයේ රස පරීක්ෂකවරයා වෙත යොමුකර ඇති බවත්, අදාළ පරීක්ෂණ කටයුතු  නිමවන තෙක් එම සහල් මෝලේ නිෂ්පාදන කටයුතු අත්හිටුවීමට පියවර ගෙන තිබෙන බවත් චන්ද්‍රකුමාර මහතා සඳහන් කළේය..
 
කොළඹ පාරිභෝගක සේවා අධිකාරියේ ප්‍රධාන අධ්‍යක්ෂ අසේල බණ්ඩාර සහ සහකාර අධ්‍යක්ෂ තාරක විදානගමආරච්චි යන මහත්වරුන්ගේ උපදෙස් මත පොළොන්නරුව පාරිභෝගික සේවා අධිකාරියේ ප්‍රධානි එච්.ජී.සී.චන්ද්‍ර කුමාර මහතාගේ මෙහෙයවිමෙන් විමර්ශන නිලධාරී බී.එම්. ජයවර්ධන මහතා, සී.එම්.හිනමින්න, එම්.එම්.සුබහීර්, එස්.එම්.ඉස්මිත්, ආර්.අන්සාර්, එම්.මිහිරාන් යන නිලධාරීහු ද පොළොන්නරුව සහ වැලිකන්ද පොලිසිය ද එක්ව මෙම වැටලීම කළහ.