(කාංචන කුමාර ආරියදාස)

සීගිරිය සිට කැකිරාව ප්‍රදේශයේ පාසල්වලට  දරුවන් ප්‍රවාහනය කරමින් තිබූ බස් රථයක්  අද(11) උදේ දඹුල්ල රන්දෙනි වැව ඇළ මාර්ගයෙන් ඉවතට පෙරළීයාමෙන් සිසු සිසුවියන් පස්දෙනෙකු තුවාල ලබා දඹුල්ල රෝහලට ඇතුළත් කර ඇතැයි දඹුල්ල පොලීසිය කියයි.

මෙම බස් රථය ධාවනය වන විට බස් රථය තුල දරුවන් 70ක් පමණ සිටි බවත්, බස් රථයේ පෙරළී  අසළ තිබූ කොහොඹ ගහකට ඇලවී තිබීම නිසා මේ ආකාරයෙන් අනතුර අවම වී තිබෙන බව පොලීසිය කියයි.

බස් රථය ත්‍රිරෝද  රථයකට ඉස්සර කිරීමට යාමේදී මෙම අනතුර සිදුව ඇත.

එම ස්ථානයේ සිටි ජනතාව බස් රථයේ වීදුරු කඩා දරුවන් එළියට ගෙන තිබිණි.

බස් රථය ධාවනය කරන අවස්ථාවේදී එහි රියදුරු පමණක් සිටි බවත්  රියසහයක හෝ කාන්තාවක නොසිටි බව සිසු සිසුවියෝ පවසති.

බස් රථයේ රියදුරුද සුළු තුවාල ලබා ඇතැයි පොලීසිය සඳහන් කළේය.

අනතුර සම්බන්ධයෙන් දඹුල්ල පොලිසිය පරීක්ෂණ පවත්වති.