2023 මාර්තු මස 20 වන සඳුදා
ජුඩ් සමන්ත
වයස අවුරුදු 11 වන පාසල් සිසුවියකට ලිංගික අතවර කළ බව කියන 52 හැවිරිදි අයෙකුව අත්අඩංගුවට ගෙන ඇති බව ආරච්චිකට්ටුව පොලීසිය කියයි.
පොලීසිය විසින් අත්අඩංගුවට ගෙන ඇත්තේ ආරච්චිකට්ටුව - රාජකදළුව ප්‍රදේශයේ පදිංචි පෙදරේරුවෙකි.
අතවරයට පත්ව ඇති දැරිවිය සැකකරුගේ නිවසට යාබද නිවසක පදිංචිව සිටින්නියකි. දැරිවියගේ පියා ඇයව ආරක්ෂිත හිස් වැසුමක් ඉල්ලා ගෙන ඒම සඳහා සැකකරුගේ නිවසට යවා ඇත.
එම අවස්ථාවේදී සැකකරු දැරිවියට අතරවරය සිදුකර මේ බව කිසිවෙකු හා නොපවසන බව දන්වා ඇයට රුපියල් 100 ක මුදලක්ද දී පිටත් කර යවා ඇත.
සති තුනකට පමණ පෙර තමන් මුහුණ දුන් සිද්ධිය දැරිවිය විසින් තම මව හා පවසා ඇත. ඒ අනුව දැරිවියගේ මව මේ බව ආරච්චිකට්ටුව පොලීසියට පැමිණිලි කරමින් සඳහන් කර ඇත.
එම පැමිණිල්ලට අනුව සැකකරුව අත්අඩංගුවට ගැනීමට පොලිස් නිලධාරීන් කටයුතු කර ඇත.
අතවරයට පත්ව ඇති දැරිවිය වෛද්‍ය පරීක්ෂණයක් සඳහා හලාවත මහා රෝහලට ඇතුළත් කර ඇත.
සැකකරු හලාවත මහේස්ත්‍රාත් අධිකරණයට ඉදිරිපත් කිරීමට නියමිතය.
