(හැටන් රංජිත් රාජපක්ෂ)                      
මධ්‍යම කඳුකරයේ බටහිර බැවුම් ප්‍රදේශවලට පසුගියදා ඇදහැලුණු අධික වර්ෂාවත් සමග ඉකුත් මස 19වැනි දින ගිනිගත්හේන නගරයේ නායගිය වෙළඳසැල් 11හි වෙළඳ ව්‍යපාරිකයින් සහ නායයෑමේ අවදානමක් නිසා ඉන් ඉවත් කළ තවත් වෙළඳසැල් 42ක ව්‍යපාරිකයින් ගිනිගත්හේන නගර මධ්‍යයේ අද (03) උද්ඝෝෂණයක් ආරම්භ කර ඇත.

නායයාම නිසා එහි ව්‍යාපාරිකයෙකු ජීවිතක්ෂයට පත් වූ අතර ජාතික ගොඩනැගිලි පර්යේෂණ ආයතනය මගින් ගිනිගත්හේන නගරයේ ඉන් අනතුරුව සිදුකළ පරීක්ෂණයකින් පසු තවත් වෙළඳසැල් 42ක් නායයාමේ අවදානමක පවතින බවට ගිනිගත්හේන ප්‍රාදේශිය ලේකම්වරයාට සහ අඹගමුව ප්‍රාදේශිය සභාවේ සභාපතිවරයාට ලබාදුන් නිර්දේශයක් මත එම වෙළඳසැල් 42 කට අඹගමුව ප්‍රාදේශිය සභාව මගින් නිකුත් කර තිබූ වෙළඳ බලපත්‍රය තාවකාලිකව ප්‍රාදේශිය සභාව මගින් අත්හිටුවනු ලැබීය.

ඉන් අනතුරුව විදුලි බල මණ්ඩලය මගින්ද එම වෙළඳසැල් වෙත ලබා දි තිබු විදුලි බලයද විසන්ධි කරනු ලැබීය.
උද්ඝෝෂණයේ නියැලි සිටින අවතැන් වූ ව්‍යාපාරිකයන් ඉල්ලා සිටින්නේ තම ව්‍යාපාරික ස්ථාන වලින් ඉවත් කිරිම නිසා තම ආර්ථික ගැටළු රාශියකට මැදිවී සිටින බවයි.

එමනිසා ව්‍යාපාර කටයුතු සිදු කරගෙන යාමට ගිනිගත්හේන නගරයේ සුදුසු ස්ථානයක ඉඩමක් හෝ වෙළඳසැල් ලබාදෙන ලෙස උද්ඝෝෂයේ නියැලි සිටින ගිනිගත්හේන නගරයේ ව්‍යපාරිකයෝ කියා සිටිති.

මෙම උද්ඝෝෂණයට සමගාමිව ගිනිගත්හේන නගරයේ සෙසු වෙළඳසැල්වල ව්‍යාපාරිකයන් විසින් කළු කොඩි ඔසවා උද්ඝෝෂණය ගිනිගත්හේන පොලිසිය ඉදිරිපිට සිදු කරනු ලබයි.

මෙම ගැටළුව සම්බන්ධයෙන් අප අඹගමුව ප්‍රාදේශිය සභාවේ සභාපති ජයසංඛ පෙරේරා මහතාගෙන් කළ විමසුකමට ඔහු කියා සිටියේ නායයෑමෙන් සහ නායයමේ අවදානමක් නිසා අවතැන් වූ වෙළඳ ව්‍යාපාරිකයන් සදහා ගිනිගත්හේන නගරයේම සුදුසු ස්ථානයක වෙළඳසැල් ඉදි කිරීමට කටයුතු කරන බවයි.