(හාලිඇල- විජේරත්න රත්නායක)
මිනුම් ඒකක ප්‍රමිති හා සේවා දෙපාර්තමේන්තුවේ බදුල්ල දිස්ත්‍රික් කාර්යාලය මඟින් සිදුකළ හදිසි වැටලීමකට අනුව වෙළඳාම් කටයුතුවලදී නීති විරෝධී කිරුම් මිනුම් උපකරණ භාවිතා කළ බදුල්ල හා මීගහකිවුල ප්‍රදේශවල වෙළෙන්ඳන් සිවු දෙනෙකුට එරෙහිව නඩු පැවරීමට එම කාර්යාලයීය නිලධාරීන් පියවර ගෙන තිබේ.

අදාළ වැටලීම්වලට අනුව මීගහකිවුල සතිපොලේ එළවළු අලෙවි කිරීම පිණිස අදාළ වර්ෂය සඳහා මුද්‍රා නොකළ ඉලෙක්ට්‍රොනික තරාදියක් භාවිතා කළ මීගහකිවුල ප්‍රදේශයේ පදිංචි වෙළෙන්ඳෙකුට, කෙසෙල් ආදිය අලෙවි කිරීමට අනුමත නොකළ මාදිලියක කිරුම් උපකරණයක් භාවිතා කළ බදුල්ල දුන්හිඳ අඹගහඔය ප්‍රදේශයේ හෝටලයක හිමිකරුට සහ පළතුරු හා බයිට් වර්ග අලෙවියේදී අදාළ වර්ෂය සඳහා මුද්‍රා නොකළ තරාදි භාවිතා කළ බදුල්ල ප්‍රධාන බස් නැවතුම්පළ අවට වෙළෙන්ඳන් දෙදෙනෙකුටද මෙසේ නඩු පැවරීමට නියමිතය.

බදුල්ල දිස්ත්‍රික් ලේකම් දමයන්ති පරණගම, අතිරේක දිස්ත්‍රික් ලේකම් ඩබ්.එම්.ආර්.රංජිත් යන මහත්ම මහත්මීන්ගේ උපදෙස් මත මිනුම් ඒකක ප්‍රමිති හා සේවා දෙපාර්තමේන්තුවේ බදුල්ල දිස්ත්‍රික් කාර්ය භාර නිලධාරී කේ.සී.ඒ.පෙරේරා, මිනුම් සේවා පරීක්ෂක පී.ඒ.ටී.පී.කුමාර, මිනුම් ප්‍රමිති සහායක කේ.පී.වසන්ත කුමාර හා ටී.අයි.ඒ.මෙන්ඩිස් සහ බදුල්ල දිස්ත්‍රික් ප්‍රවෘත්ති නිලධාරී සමන් හේරත් යන මහත්වරු මෙම වැටලීම් සඳහා එක්වූහ.