(අනීෂා මානගේ)

තංගල්ල මූලික රෝහලේ නව ළමා වාට්ටු සංකීර්ණය අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් අද (15) විවෘත කෙරිණි.

තංගල්ල රුහුණු කරළිය සංවිධානය, දකුණු පළාත් සභාව සහ රෝහල් සංවර්ධන කමිටුවේ මූල්‍ය දායකත්වයෙන් මෙම වාට්ටු සංකීර්ණය ඉදිකර තිබේ.

මෙම ළමා වාට්ටු සංකීර්ණය මහල් තුනකින් සමන්විත වන අතර මෙය ඉදිකිරීමට රුපියල් ලක්ෂ පන්සිය පනහක පමණ මුදලක් වැය වී තිබේ.

මෙම ළමා වාට්ටුව සඳහා රුපියල් ලක්ෂ අසූවක වෛද්‍ය උපකරණද මහින්ද රාජපක්ෂ මහතා විසින් තංගල්ල මූලික රෝහලට ලබා දුන්නේය.

මෙම අවස්ථාවට සහභාගි වූ කාන්තා සහ ළමා කටයුතු, සමාජ ආරක්ෂණ, සෞඛ්‍ය හා පෝෂණ අමාත්‍ය නීතීඥ පවිත්‍රා දේවි වන්නිආරච්චි මහත්මිය මෙසේ පැවසුවාය,

           ‘‘තංගල්ල රෝහලේ ඉඩකඩ සලකා බලමින් පවරා ගැනීමට හැකි අවට ඉඩම් සම්බන්ධයෙන් සලකා බලමින් ලංකාවේ තිබෙන ඉහළම ගණයේ මූලික රෝහලක් බවට තංගල්ල මූලික රෝහල පරිවර්තනය කර කලින් සැලසුම් කළ ගොඩනැගිලි සංකීර්ණයක් ලබා දෙන්නැයි අගමැතිතුමා උපදෙස් දුන්නා.

තංගල්ල මූලික රෝහල දැනට තිබෙන තත්ත්වයට වඩා විදිමත් සැලසුමකට අනුව ලංකාවේ තිබෙන ඉහළම මට්ටමේ රෝහලක් බවට පත් කිරීමට අපි කටයුතු කරනවා‘‘ යැයි අමාත්‍යවරිය පැවසුවාය.

මේ අවස්ථාවට දක්ෂිණ ලංකාවේ ප්‍රධාන සංඝනායක තංගල්ල වජිරිගිරිය සහ රත්මලාන චකින්දාරාම විහාරස්ථානවල විහාරාධිපති තංගල්ල මූලික රෝහල් කමිටුවේ අනුශාසක මිරිස්සේ ධම්මවංශ හිමි, ප්‍රවාහන සේවා කළමණාකරන, විදුලිබල සහ බලශක්ති අමාත්‍ය මහින්ද අමරවීර, හම්බන්තොට දිස්ත්‍රික් පාර්ලිමේන්තු මන්ත්‍රී ඩී.වී.චානක, දකුණු පළාත් ආණ්ඩුකාර විලී ගමගේ, දකුණු පළාත් සභාවේ සභාපති සෝමවංශ කෝදාගොඩ, හිටපු දකුණු පළාත් සභා මන්ත්‍රීවරුන් වන ඩී.වී.උපුල්, අජිත් රාජපක්ෂ යන මහත්ම මහත්මීන්, ප්‍රාදේශීය සභා සහ නගරසභා මන්ත්‍රීවරුන් ඇතුළු රෝහල් කාර්යය මණ්ඩලයේ පිරිසක් එක්වූහ.