(නාලක සංජීව දහනායක)
 
ජනාධිපති අපේක්‍ෂකත්වයට රණ්ඩුවෙන රනිල් - සජිත් සමග ඉදිරියට යන්නේ කෙසේදැයි ජනතාව ගැඹුරින් කල්පනා කර බැලිය යුතුයැයි විපක්‍ෂනායක මහින්ද රාජපක්‍ෂ මහතා අද (25) පැවැසීය.
 
මොවුන් දෙදෙනාගේ බල අරගලය හේතුවෙන් රට එකතැන පල්වෙන බවද විපක්ෂ නායකයා ප්‍රකාශ කළේය.
 
රාජපක්ෂ මහතා මෙසේද පැවැසීය.
 
“අපි අපේ අපේක්ෂකයා තෝරලා ඉවරයි. නමුත් මේ අයට තවම අපේක්ෂකයා තෝරා ගන්න බැහැ. ඔවුන් අතර ගැටුමක්. ව්‍යවස්ථාවේ ජනාධිපතිගේ හා අගමැතිගේ බලකේන්ද්‍ර දෙකක් තිබෙනවා. දෙන්නා දෙපැත්තට අදින කොට රටක වැඩක් කරන්න බැහැ.
 
දැන් ජනාධිපති අගමැති දෙපැත්තට අදින එකෙන් රට එක තැන පල් වෙනවා. ඒ විතරක් නෙවෙයි. කරන තරගයත් එක්ක අයෙත් බලය ගත්තොත් වෙන්නේ ජනතාව නැවතත් ප‍්‍රශ්නවලට මුහුණ පාන එකයි. මේ දෙන්නගේ රණ්ඩුව දිහා රටම බලන් හිටියා. ජනාධිපති අපේක්ෂකයා වෙන්න රණ්ඩු වුණ දෙන්නෙක්ව බලයට ගෙනත් කොහොමද රටක් ඉදිරියට යන්නේ. අපේ පැත්තේ ඒ වගේ ගැටුම් නැහැ. ගෝඨාභයට ඉදිරියට යන්න පාර පැහැදිලියි”
 
කොළඹඑ, ඩී. ආර්. විජයවර්ධන මාවතේ පිහිටි ශ්‍රී ලංකා ප‍්‍රදර්ශන හා සම්මේලන මධ්‍යස්ථානයේදී අද (25) පැවැති විදෙස්ගත ශ‍්‍රමිකයන්ගේ හා මැදපෙරදිග සේවක පවුල්වල සාමාජිකයන්ගේ සංගමයේ සම්මේලනයට සහභාගීවෙමින් වෙමින් හෙතෙම මේ බව සඳහන් කළේය.