(සිතුම් චතුරංග)

උතුරු පළාතේ ප‍්‍රදේශ රැසක ධනවත් ව්‍යාපාරිකයින්ගේ නිවාසවලට පැන විදුලි උපකරණ හා රන් භාණ්ඩ කොල්ලකෑ බව කියන පුද්ගලයකු අද (08) වවුනියාව වේප්පම්කුලම් ප‍්‍රදේශයේදී අත්අඩංගුවට ගත් බව වවුනියාව පොලිසිය පවසයි.

මේ ගැන වවුනියාව නොවිසිඳුණු අපරාධ විමර්ශන ඒකකය වෙත ලැබුණ පැමිණිලි මත සිදුකළ විමර්ශනයකදී සැකකරු අත්අඩංගුවටගත් බව පොලිසිය කියයි.

සැකකරු මත්ද්‍රව්‍ය ජාවාරම් හා නිවාස කොල්ලකෑම් සම්බන්ධයෙන් කොළඹ මහධිකරණයේ සහ උතුරේ අධිකරණ කිහිපයක වරෙන්තු ලැබූ පුද්ගලයකු බව පොලිසිය පවසයි.

සැකකරු තවත් පුද්ගලයකු සමග එක්ව මෙම සොරකම් කර ඇතැයි ද කියැවේ. එක් නිවසකින් කොල්ලකන ලද විදුලි උපකරණ ඇතුළු භාණ්ඩ තොගයක් පොලිසිය විසින් සොයාගෙන ඇත.    

කොල්ලකෑම් සඳහා සහය දැක්වූ අනෙක් පුද්ගලයා අත්අඩංගුවටගැනීමට විශේෂ විමර්ශනයක් ආරම්භ කර ඇතැයි ද පොලිසිය පැවසීය.