ජේ.කේ.එල්.චාමින්ද
 
කඩු ප්‍රහාරයකට ලක්වීමෙන්  පුද්ගලයකුගේ  වම්  අතේ මැණික් කටුවට පහලින් වෙන්ව තිබු  කොටස  සාර්ථක සැත්කමකින් පසු යලි බද්ධ කිරිමට කරාපිටිය ශික්ෂණ රෝහලේ නහර හා අවයව බද්ධ කිරීමේ ඒකකයේ වෛද්‍යවරුන් සමත්ව ඇත. 

 
මේ සදහා ප්ලාස්ටික් හා විකලංග ශල්‍ය ඒකකයේ වෛද්‍යවරුන්ගේ ද සහාය හිමිවි ඇත.
 
 කඩු ප්‍රහාරයට ලක්වූ පුද්ගලයා ව්‍යාපාරිකයකු වන අතර  ඔහු  හික්කඩුවේ නිවසක පැවති උපන්දින සාදයකට සහභාගි වෙමින් සිටියදී  කඩු ප්‍රහාරයට ලක්ව ඇති බැව් හික්කඩුව පොලිසිය කියයි. 
 
කඩු ප්‍රහාරයට ලක්වීමෙන් මේ පුද්ගලයා වම්  අතේ මැණික් කටුවට පහලින් වූ  කොටස වෙන්ව ගොස් තිබූ අතර  එම අතේ කොටස ද සමඟ තුවාලකරු කරාපිටිය ශික්ෂණ රෝහලට ඇතුලත්කොට ඇත.
 
නහර හා අවයව බද්ධ කිරිමේ ඒකකයේ  ප්‍රධානී විශේෂඥ ශල්‍ය වෛද්‍ය  රංජුක ඔඹේසිරි,   විශේෂඥ ප්ල්ස්ටික් ශල්‍ය වෛද්‍ය සතිස්  විජේමාන්න, වෛද්‍යවරුන් වන කපිලාන් රංජන්, ගිහාන්, කසුන් ,මුදිත යන  වෛද්‍යවරු    මෙම සැත්කම සඳහා එක්වුහ. 
 
සැත්කම සඳහා පැය පහක් පමණ ගතවී ඇත.