(මොහොමඩ් ආසික්)

බාල දක්ෂ ව්‍යාපාරය තුල තිබිය යුතු හා  තිබෙන මූලික සිද්ධාන්ත මූලික ප්‍රතිපත්ති මූලික දර්ශනය මුල් කර ගත් තේමාව තුල කටයුතු කරමින් කාලානුරූපය යුගයට අවශ්‍ය පරිදි තාක්ෂණ  ලෝකය තුල බාලදක්ෂ ව්‍යාපාරය තුලත් අවශ්‍ය වෙනස්කම් සිදු විය යුතු බව  ජනාධිපති මෛත්‍රීපාල සිරිසේන මහතා කීය.

ශ්‍රී  ලංකා බාල දක්ෂ ව්‍යාපාරයේ නියුක්ව ව සිටින බාලදක්ෂයින් හට  බාලදක්ෂ ජනාධිපති  සම්මාන පිරිනැමීම සඳහා අද 20 වනදා මහනුවර පොල්ගොල්ල මහින්ද රාජපක්ෂ සම්මන්ත්‍රණ ශාලාවේදී පැවැති උත්සවය අමතමින් ජනාධිපති මෛත්‍රීපාල සිරිසේන මහතා එසේ කීය.

මෙහිදී තව දුරටත් අදහස් දැක්වූ ජනාධිපතිතුමන් මෙසේද කීය.

‘‘මා බාල දක්ෂයෙකු වශයෙන් සිටි කාලයේ තිබූ සමාජ ප්‍රශ්න නෙවෙයි අද තියෙන්නේ. එදා තිබුණ ලෝකය නෙවෙයි අද තියෙන්නේ. එදා තිබුණ සමාජ වටපිටාව නෙවෙයි අද තියෙන්නේ. එදා පාසැල් ශිෂ්‍යයෙකුට මුහුණ දෙන්න තිබූ අභියෝග නෙවෙයි අද තියෙන්නේ. අද එයට වඩා සියල්ලම වෙනස් වෙලා තියෙනවා. එ් නිසා  වාණිජ සමාජයක තරඟකාරී  සමාජයක යහපත් දේට වඩා අයහපත් දේ නරක දේ අවිනීත දේ විශාල වශයෙන් ගලා යන ලෝකයක අපි ඒවාට මුහුණ දිය යුතු  වෙනවා. ඒ තුළ අපේ ජීවිතය වඩාත් යහපත් ලෙස සකස් කර ගත යුතු වෙනවා. විභාග ඉහළින් සමත්වන දරුවන් ඒ විභාග සමත් වීමට සැම විටම ලබා දිය යුතු ප්‍රමුඛත්වය මෙන්ම ජීවිතය සමත්වීමට සැමවිටම අවශ්‍ය ප්‍රායෝගික සමාජයේ අභියෝගවලට අප මුහුණ දිය යුතු වෙනවා. ඒ නිසා විභාග සමත් වන ඔබට ජීවිතය සමත් වන්න බාල දක්ෂ ව්‍යාපාරය ඉතා විශිෂ්ට වූ කාර්යයක නියැලී සිටිනවා කියලයි මම විශ්වාස කරන්නේ....“යැයිද ජනාධිපතුමා මෙහිදී කිය.

මෙම  අවස්ථාවට මධ්‍යම පළාත් ආණ්ඩුකාර පී.බී.දිසානායක,  මධ්‍යම හිටපු මහ අමාත්‍ය සරත් ඒකනායක, මහනුවර නගරාධිපති කේරස සේනානායක, ප්‍රධාන බාලදක්ෂ කොමසාරිස් මෙරිල් ගුණලික යන මහත්වරුන් ඇතුළු  විශාල පිරිසක්ද  එක්ව සිටිහය.