(කාංචන කුමාර ආරියදාස)


දඹුල්ල ඉනාමළුව රජයේ රක්ෂිතයේ තිබූ  ගොඩ කිරල ගස් තුනක් කපා දැව කඳන් ටැක්ටරට ප්‍රවාහනය කරමින් සිටි වන නිලධාරීයකු, සුළු සේවකයකු  සහ සිවිල් පුද්ගලයෙකු  ට්‍රැක්ටර් රථයක් දඹුල්ල ඇටවරාහේන ප්‍රදේශයේදී  සැකපිට දඹුල්ල පොලිස් විශේෂ කාර්ය බළකා නිලධාරීන් අත්අඩංගුවට ගෙන තිබේ .


මෙසේ අත්අඩංගුවට පත් දැව කදන් 12 ක්, සැකකරුවන් තුනක් ටැක්ටර් රථයක් වන නිලධාරින් පැමිණි යතුරුපැදි දෙකක්  සීගිරිය පොලිසියට බාරදුන් බව පොලිස් විශේෂ කාර්ය බළකා නිලධාරීන් පැවසුහ .


 අත්අඩංගුවට ගත් වන නිලධාරීන් දඹුල්ල ඉනාමළුව වන සංරක්ෂණ කාර්යාලය සේවයේ නිරත ව සිටින බව පොලිසිය කියයි.  මෙම ප්‍රදේශයේ තවත් ගස් රැසක්  කපා දමා තිබෙන බව පොලිස් විශේෂ කාර්ය බළකාය කියයි.

මෙම   දැව ප්‍රවාහනයට හෝ හෙලීම් සඳහා කිසිදු බලපත්‍රයක් ඔවුන් සතුව නොතිබුණු බව පොලිසිය කියයි.


කාලයක සිට සිගිරිය ප්‍රදේශයේ ලී කැටයම් කපන කර්මාන්තය සදහා රජයේ රක්ෂිතයේ ඇති සංරක්ෂිත දුර්ලභ ගොඩකිරිල්ල ගස් කපා අධික මිලයකට අලෙවි  කිරීම සිදුකරන බවය පොලිස් විශේෂ කාර්ය බළකා නිලධාරීන් වෙත තොරතුරු ලැබී තිබිණි .


රක්ෂිතයේ දැව  සොරුන් සැකපිට අල්ලාගෙන වන කාර්යාලයට රැගෙන යන ආකාරයට වන නිලධාරින් ටැක්ටර් රථයේ ඉදිරියෙන් අයකුද පිටුපසින් අයකුද සමඟ ජනතාවට පෙනෙන සේ ගමන් කරමින් සිටියදී මෙසේ අත්අඩංගුවට ගෙන ඇත .


වන නිලධාරින් පොලිසියට කියා ඇත්තේ තේක්ක ගස් ඉවත් කිරීමේ වැඩසටහන යටතේ රක්ෂිතයේ තිබුණු ගසක් කඩා වැටි එම දැව කදන් කාර්යාලයට රැගෙන යන බවයි .පසුව පොලිස් විශේෂ කාර්ය බළකා නිලධාරීන් එම ගස බැලීමට ඔවුන් සමග රක්ෂිතයට යද්දී එවැන්නක් නොව ගස් රැසක් කපා ඇති බව නිරීක්ෂණයට ලක්වූ බව පොලිස් විශේෂ කාර්ය බළකා නිලධාරීන් පවසති .


නැවත ප්‍රශ්න කිරීමේදී කියා ඇත්තේ වන කාර්යාලයක් ඉදිකිරීම් සදහා මේ ගස් කපා රැගෙන යන බවය .ඒ සදහා අවසර පත්‍ර විමසීමේදී කිසිවක් නොමැති නිසා පිරිස් අත්අඩංගුවට ගත් බව පොලිස් විශේෂ කාර්ය බළකා නිලධාරීන් පවසති .